Helgi tefldi við 27 gesti.

  Í dag á fjörutíu ára afmæli Heimaeyjargossins stór Taflfélag Vestmannaeyja, Grunnskólinn í Vestmannaeyjum og Vestmannaeyjabær fyrir fjöltefli í húsi Akóges í Vestmannaeyjum.

  Helgi Ólafsson, stórmeistari og félagsmaður í Taflfélagi Vestmannaeyja tefldi við gesti, en þess má geta að Helgi var einn þeirra sem yfirgáfu Heimaey gosnóttina fyrir 40 árum. 

  Alls mættu 27 í fjölteflið, en rúmlega helmingurinn voru grunnskólabörn.  Taflið hófst kl. 13 og var lokið rétt fyrir klukkan þrjú. Fór það svo að Helgi vann 25 skákir, en samdi jafntefli við Nökkva Sverrisson og Karl Gauta Hjaltason.

  Þeir þáttakendur sem best stóðu sig fengu ýmsar gjafir frá Vestmannaeyjabæ og Helgi Ólafsson útnefndi skákina við Nökkva bestu skákina og hlaut Nökkvi ferð með Ernir/Flugleiðum innanlands að launum.

Fjöltefli í dag kl. 13:00 í Akóges.

  Í tilefni af 40 ára afmæli gossins á Heimaey, stendur Taflfélag Vestmannaeyja i samvinnu við Grunnskólann í Vestmannaeyjum og Vestmannaeyjabæ fyrir fjöltefli í Akóges í dag miðvikudaginn 23 janúar og hefst fjölteflið kl. 13:00.

  Sá sem mun etja þar kappi við gesti og gangandi er stórmeistarinn og Eyjamaðurinn Helgi Ólafsson.  Krökkum á grunnskólaaldri verður gefið frí úr skólanum á þessum tíma til þess að geta tekið þátt í fjölteflinu.

  Allir eru velkomnir á fjölteflið, en félagar í Taflfélaginu sjá um framkvæmd fjölteflisins, en Helgi hefur um langt árabil verið félagsmaður í Taflfélaginu.

Fjöltefli á miðvikudag kl. 13:00 í Akóges

  Í tilefni af 40 ára afmæli gossins á Heimaey, stendur Taflfélagið ásamt, grunnskólanum og Vestmannaeyjabæ fyrir fjöltefli í Akóges n.k. miðvikudag 23 janúar og hefst fjölteflið kl. 13:00.

  Sá sem mun etja þar kappi við gesti og gangandi er stórmeistarinn og fyrrum Eyjamaðurinn Helgi Ólafsson.

  Allir eru velkomnir á fjölteflið meðan húsrúm leyfir og munu félagar í Taflfélaginu sjá um framkvæmd fjölteflisins, en Helgi hefur um langt árabil verið félagsmaður í Taflfélaginu hér.

Einar K. sigraði í Volcano mótinu á gamlársdag.

  Fjórtán galvaskir taflmenn mættu á hið árlega Volcano skákmót í Vestmannaeyjum á gamlársdag.  Tefldar voru 13 umferðir hraðskák, allir við alla.  Veitingahúsið Volcano gaf verðlaunin, sem voru af veglegri gerðinni.  Veitt voru verðlaun fyrir efstu menn og einnig fyrir grunnskólanemendur.

  Einar K. Einarsson og Sigurjón Þorkelsson voru í banastuði og í mótinu í heild stóðu þeir efstir og jafnir með 11 vinninga og tefldu bráðabana um efsta sætið og vann Einar einvígið 1,5-0,5.  Í næstu sætum voru svo feðgarnir Nökkvi og Sverrir og voru aðeins 1/2 vinningi á eftir.

  Í yngri flokki sigraði Kristófer Gautason með 8 vinninga, en Sigurður og Jörgen komu næstir með 2,5 vinninga.  Jörgen stóð sig vel og lagði sér kunnari kappa, en gekk ekki eins vel á móti sínum jafnöldrum.

Heildarúrslit Volcanomótið 2012. 

		EK	SÞ	NS	SU	ÆF	KG	ES	Ga	SJ	EG	JÓ	SI	Ey	Á	Vinn
1	Einar K. Ein	X	0	1	½	1	1	½	1	1	1	1	1	1	1	11
2	Sigurjón Þ.	1	X	0	0	1	1	1	1	1	1	1	1	1	1	11
3	Nökkvi Sv.	0	1	X	1	1	0	½	1	1	1	1	1	1	1	10,5
4	Sverrir Unn.	½	1	0	X	0	1	1	1	1	1	1	1	1	1	10,5
5	Ægir Páll F.	0	0	0	1	X	1	1	1	1	1	0	1	1	1	9
6	Kristófer G.	0	0	1	0	0	X	½	1	½	1	1	1	1	1	8
7	Einar Sig.	½	0	½	0	0	½	X	½	0	1	1	1	1	1	7
8	Karl Gauti	0	0	0	0	0	0	½	X	1	1	1	1	1	1	6,5
9	Steinn J.	0	0	0	0	0	½	1	0	X	1	0	1	1	1	5,5
10	Einar Guðl.	0	0	0	0	0	0	0	0	0	X	1	1	1	1	4
11	Jörgen Fr.	0	0	0	0	1	0	0	0	1	0	X	½	0	0	2,5
12	Sigurður M.	0	0	0	0	0	0	0	0	0	0	½	X	1	1	2,5
13	Eyþór Kj.	0	0	0	0	0	0	0	0	0	0	1	0	X	1	2
14	Ágúst Már	0	0	0	0	0	0	0	0	0	0	1	0	0	X	1

 

Volcanomótið kl. 12:00.

   Í dag, gamlársdag verður hið árlega Volcanoskákmót haldið að venju á veitingastaðnum Volcano við Strandveg í Vestmannaeyjum og hefst mótið kl. 12:00.

   Allir velkomnir.  Hefðbundin verðlaun.

Volcanomótið eina skákmótið á landinu á gamlársdag !

  Eins og svo oft áður fara Eyjamenn ótroðnar slóðir í flestum hlutum.

  Þannig er það nú, þegar mótaskrá yfir hátíðarnar eru skoðuð þá sést að eina skákmótið sem haldið er á Jóladag var Jólamót TV og eina mótið sem haldið er á gamlársdag er Volcanomótið í Eyjum.  Það er ekki að undra þótt skákþyrstir aðilar ofan af landi horfi hingað öfundaraugum þegar þeir sitja og horfa í gaupnir sér á þessum dögum og dreymir um að komast á gott skákmót, þegar ekkert er um að vera.  Þeim til upplyftingar eru ferðir Herjólfs einfaldar og aðgengilegar, því siglt er allt að tvisvar sinnum á hverjum degi frá Þorlákshöfn til fyrirheitnu eyjanna og er aðbúnaður um borð allur til mikillar fyrirmyndar, æludallar í miklu magni og siglingin aðeins 3 tímar í góðu veðri og á viðráðanlegu verði, aðeins u.þ.b. 35.000 kr. fram og til baka fyrir fjölskylduna með bíl og klefa.

  Þannig kom það engum á óvart nú rétt fyrir jólin að þekktur fangi á Litla Hrauni strauk úr fangelsinu og þegar hann gaf sig fram þá sagðist hann hafa ætlað á Jólamót TV, en var kominn langleiðina niður í Landeyjahöfn þegar hann uppgötvaði að Herjólfur sigldi ekki lengur um þá höfn og sá sinn kost vænstan að gefa sig fram og tefla þess í stað við félaganna á Litla Hrauni.

  Á morgun Gamlársdag er Volcanomótið og hefst kl. 12:00 á veitingastaðnum Volcano við Strandveg, allir velkomnir á mótið - hefðbundin verðlaun.

Volcanomót TV á morgun kl. 12:00

  Á morgun, gamlársdag fer fram fjórða Volcanomót Taflfélags Vestmannaeyja á veitingastaðnum Volvano við Strandveg í Vestmannaeyjum og hefst mótið kl. 12:00.

  Volcanomótið er nú orðið árviss viðburður í skáklífi Vestmannaeyja, en í fyrra fór allur ágóði af mótinu til styrktar Steingrími Jóhannessyni, sem þá barðist við veikindi.

  Í ár verður mótið með hefðbundnu sniði og gefur veitingastaðurinn öll helstu verðlaun.

  Allir velkomnir meðan húsrúm leyfir

Einar sigraði Jólamót TV.

  Það hefur verið keppikefli fjölmargra skákmanna að geta státað af því að minnsta kosti einu sinni á lífsleiðinni að sigra á Jólamóti Taflfélags Vestmannaeyja, sem er eitt allra elsta og virtasta skákmót landsins og það eina sem haldið er á Jóladag í gjörvallri heimsbyggðinni.  Það hefur þannig verið eins og meðal virtustu fræðimanna að ná því að krækja í Nóbelinn eða kvikmyndafólks að rækja einu sinni í Óskarinn.

  Síminn stoppaði ekki hjá formanni félagsins á Jóladagskvöld, þegar óþreyjufullir skákáhugamenn vildu frétta af úrslitum mótsins - svona er skákhungrið um jólin, þegar fátt eitt er að frétta af skákiðkun um allt land, nema héðan úr Eyjum.  Því er það nú sem ég færi yður mikinn fögnuð, með gleði og mikilli ánægju flyt ég ykkur, lesendur góðir, fregnir af Jólamóti TV 2012.

  Í ár var engin breyting á umfangi mótsins og mættu 8 manns á mótið, margir um langan veg og rifu sig upp úr jólasleninu, slitu af sér límborða jólagjafanna, stóðu upp frá jólahangiketinu og örkuðu niður í Skáksetrið á Heiðarvegi og tóku nokkrar snarpar skákir við félagana.

  Að þessu sinni kom Einar Sigurðsson, þessi gamalkunni Skák-Rambó og lagði alla andstæðinga sína, nema hvað Sverrir náði að leggja Jaxlinn.  Eftir að sigurinn varð ljós var ekki örgrannt um að sjá hafi mátt tár á hvarmi Jaxlsins, enda ekki á hverjum degi sem menn sigra Jólamót TV, hann getur lifað mörg ár á þessari frægðarför sinni.  Til hamingju Einar Sigurðsson !  Í öðru sæti voru margir kunnir baráttumenn, Kristófer, Sverrir og Nökkvi skiptu með sér þessu sæti, en aðrir voru neðar.

Mótstaflan :

		ES	KG	SU	NS	DSJ	KGH	EDK	JFÓ	Vinn
1	Einar Sigurðsson	XX	1	0	1	1	1	1	1	6
2-4	Kristófer Gautason	0	XX	1	1	0	1	1	1	5
2-4	Sverrir Unnarsson	1	0	XX	0	1	1	1	1	5
2-4	Nökkvi Sverrisson	0	0	1	XX	1	1	1	1	5
5	Daði Steinn Jónsson	0	1	0	0	XX	1	1	1	4
6	Karl Gauti Hjaltason	0	0	0	0	0	XX	1	1	2
7	Eyþór Daði Kjartansson	0	0	0	0	0	0	XX	1	1
8	Jörgen Freyr Ólafsson	0	0	0	0	0	0	0	XX	0

Mayarnir sáu Jólamót TV fyrir.

  Fornleifafræðingar hafa nú loksins ráðið heimsendagátu Mayanna í Mið Ameríku.

  Hér sést letrið sem kom fræðimönnum á sporið og ef rýnt er í táknið neðst lengst til vinstri sést glöggt að vísað er í Vestmannaeyjar og skáklistin kemur fram í tákninu við hliðina.  Efsta röðin segir til um tímasetningu Jólamóts TV, 25. desember 2012 kl. 14:00 að Heiðarvegi 9, Veðurspáin sést í efsta tákninu lengst til hægri en Mayarnir spá hvassri austanátt á þessum degi.

  Eins og kunnugt er hefur það vakið athygli ýmissa fræðinga að tímatal Mayanna virðist enda 25 desember 2012 og margir tækifærissinnar hafa notfært sér þessa ráðgátu og talið þetta vera merki um heimsendi þennan dag.  Nú hafa virtustu spekingar í þessum fræðum loksins ráðið þessa fornu gátu.  Sá atburður sem tímatalið endar á virðist eiga sér stað á Íslandi og eftir nýjustu upplýsingum gerist þetta í Vestmannaeyjum og er auðvitað Jólaskákmót TV sem er eini markverði atburðurinn þennan dag í skáklífi heimsins.

Árvisst Jólamót TV á Jóladag kl. 14

  Eins og endranær verður jólamót TV haldið á Jóladag og hefst kl. 14:00.  Eins og oft hefur komið fram á undanförnum árum er þetta eina skákmótið á landinu þennan dag og koma margir gestir ofan af landi einvörðungu til að geta teflt skák þennan dag.  Flestir gestanna gista í gömlu verbúðunum, enda nægt gistirými þar fyrir gesti og gangandi.  Gestir, sem koma langt að, eiga síðan kost á að gæða sér á gómsætri jólasúpu, sem afgreidd er annarstaðar í bænum.

  Allir eru velkomnir á mótið, sem er á léttu nótunum.