Atskákmót til minningar um Bedda á Glófaxa haldið í Eyjum 11. maí

Taflfélag Vestmannaeyja stendur fyrir atskákmót laugardaginn 11. maí nk. til minningar um Bergvin Oddsson - Bedda á Glófaxa - skipstjóra og útvegsmann í Vestmannaeyjum í samstarfi við fjölskyldu hans. Bergvin féll frá 22. sept. sl. 75 ára að aldri. Bergvin tók virkan þátt í starfsemi TV fljótlega eftir að fjölskylda hans flutti til Eyja árið 1964 og var mjög liðtækur skákmaður og tók þátt í mörgun skákmótum hjá félaginu. Eftir að hann fór í útgerð á Glófaxa  Ve. nokkru eftir eldgosið á Heimaey 1973 dró nokkuð úr þáttöku hans, en Beddi leiddi í mörg ár skáksveit sjómanna í keppni þeirra við landmenn á Sjómannadaginn. Bergvin var til margra áratuga einn af öflugustu bakhjörlum Taflfélags Vestmannaeyja.

Bergvini og minningu hans til heiðurs varð að ráði að efna til sérstaks skákmóts í samstarfi við fjölskyldu hans og til styrktar skáklifinu í Eyjum, laugardaginn 11. maí 2019, á gamla lokadaginn.

Minningarmótið hefst kl. 12.00 á hádegi og verða tefldar 8 umferðir eftir hinu vinsæla atskákformi, 15. mín. á skák og +5 sek á leik. Eftir fjórar umferðir verður tekið kaffihlé og síðan taka við aðrar fjórar umferðir. Reiknað er með að mótinu ljúki kl. 19.00 um kvöldið, úrslit kynnt og veitt vegleg verðlaun. Fyrstu verðlaun verða 200 þús. kr., 2. verðlaun 125 þús. kr. og 3ju verðlaun 75 þús. kr. Gunnar Björnsson forseti Skáksambands Íslands verður mótsstjóri. Ekkert mótsgjald og allir velkomnir.

Herjólfur mun sigla sjö ferðir á dag milli Eyja og Landeyjahafnar þegar mótið fer fram.  Fyrir keppendur ofan af landi sem ætla að dvela daginn í Eyjum er hægt að fara kl. 10.45  í 35 mín. siglingu frá Landeyjahöfn til Eyja (mæting 30 mín. fyrir brottför)  og frá Eyjum að loknu móti kl. 22.00 um kvöldið. Fyrir þá sem ætla að dvelja lengur er nægt gistirými og margt að skoða í Eyjum - þar sem vorið kemur fyrst. Skráning á Beddamótið er á skák.is

Hallgrímur Steinsson Vestmannaeyjameistari 2019

Skákþing Vestmannaeyja 2019 hófst 24. janúar sl. og lauk 27. febrúar, teflt var í skáksetri Taflfélags Vestmannaeyja að Heiðarvegi 9.

Keppendur voru átta og var tefld einföld umferð, allir við alla. Teflt á fimmtudögum kl. 20.00 og sunnudögum kl. 13.00, en frestuðum skákum eftir atvikum. Umhugsunartími var 60 mín. að viðbættum 30 sek á hvern leik.

Skákmeistari Vestmannaeyja 2019 varð Hallgrímur Steinsson með 5,5 vinning, í 2.-3. sæti voru Sigurjón Þorkelsson og Arnar Sigurmundsson með 5 vinninga.

Þetta er í fyrsta skipti sem Hallgrímur hlýtur þennan sæmdartitil og er hann 25 maðurinn sem hann hlýtur. Sitjandi meistari var Sigurjón Þorkelsson, en hann borið tignina alls 13 sinnum, fyrst 1986, síðan 1988, 89, 91, 92, 93, 96, 97, 2002, 03, 06, 17 og síðast 2018. Arnar hefur verið Skákmeistari Vestmannaeyja 4 sinnum, fyrst 1964, 1969, 1970 og síðast 1979. 

Skákþing Vestmannaeyja 2019

Keppendaskrá -             1. umf. 2.umf. 3.umf. 4.umf  5.umf. 6.umf. 7. umf. vinn. röð   

                           24/01   31/01  07/02  10/02  14/02  21/02   27/02  Samt

1. Páll Árnason         1 (8)   0 (2)  0 (3)  0 (4)  1 (5)  0 (6)   0 (7)  2,0    6.
2. Stefán Gíslason      1/2 (7) 1 (1)  1 (8)  1/2(3) 1 (4)  1/2(5)  0 (6)  4,5    4.-5
3. Sigurjón Þorkelsson  1/2 (6) 1 (7)  1 (1)  1/2(2) 1 (8)  0 (4)   1 (5)  5.0    2.-3.
4. Hallgrímur Steinsson 1 (5)   1 (6)  1/2(7) 1 (1)  0 (2)  1 (3)   1 (8)  5,5    1. sæti
5. Guðgeir Jónsson      0 (4)   1 (8)  0 (6)  0 (7)  0 (1)  1/2(2)  0 (3)  1,5    7.
6. Einar B. Guðlaugsson 1/2 (3) 0 (4)  1 (5)  1 (8)  0 (7)  1 (1)   1 (2)  4,5    4.-5
7. Arnar Sigurmundsson  1/2 (2) 0 (3)  1/2(4) 1 (5)  1 (6)  1 (8)   1 (1)  5,0    2.-3.
8. Gísli Eiríksson      0 (1)   0 (5)  0 (2)  0 (6)  0 (3)  0 (7)   0 (4)  0,0    8.

 

Taflfélagið í 2 sæti og fer upp um deild

Taflfélag Vestmannaeyja lenti í 2. sæti í þriðju deild á íslandsmóti skákfélaga sem lauk um síðustu helgi, en fyrri hluti mótsins fór fram í nóvember.

Félagið sendi tvær sex manna sveitir á mótið, aðra í 3ju deild en hina í fjórðu deild. Alls tóku 17 keppendur frá TV þátt í keppninni þessa helgi, en talsvert fleiri ef fyrri umferðin eer talin með. A Sveit TV endaði í öðru sæti af fjórtán sveitum í 3ju deild og teflir því í 2. deild næsta haust. Alls voru tefldar sjö umferðir og kom þessi góði árangur nokkuð á óvart, því eftir fyrri hlutann var sveitin í 7. sæti. Keppnin var mjög jöfn um 2. sætið og var sveit TV ½ vinningi fyrir ofan sveit Skagamanna þegar upp var staðið.

Í fjórðu deild gekk sveit TV einnig vel og endaði í 5. sæti af 14. Sveitir TV eru skipaðar félögum í TV, búsettum  í Eyjum eða uppi á landi. Á fyrsta borði tefldi Ægir Páll Friðbertsson og aðrir í liðinum voru þeir Nökkvi Sverrisson, Sigurjón Þorkelsson, Sverrir Unnarsson, Kristófer Gautason, Lúðvík Bergvinsson, Aron Ellert Þorsteinsson, Alexander Gautason, Hallgrímur Steinsson, Arnar Sigurmundsson, Andri Hrólfsson, Ólafur Hermannsson, Páll J. Ammendrup, Páll Ammendrup Ólafsson, Bjartur Týr Ólafsson og Sindri Freyr Guðjónsson.

Tefldu hver um sig ýmist 1, 2 eða 3 skákir um helgina. Liðstjórar voru Arnar Sigurmundsson í 3ju deild og Ólafur Hermannsson í 4. deild. Að sögn Arnars formanns TV, kallar þessi góði árangur á enn ríkari kröfur til okkar manna á næsta keppnistímabili, því sveitir í 2. deild á Íslandsmóti skákfélaga eru töluvert sterkari en í 3ju deild.  Á sama hátt verður spennandi verkefni að koma sveit TV í fjórðu deild upp í þriðju deild að ári.

Taflfélag Vestmannaeyja með tvær sveitir.

Íslandsmót skákfélaga 2018-2019

Taflfélag Vestmannaeyja með tvær keppnissveitir.

  Íslandsmót skákfélaga 2018-2019, fyrri hluti fór fram í Rimaskóla í Grafarvogi 8.-11. nóv. 2018. Teflt er í fjórum deildum og tóku 46 sveitir þátt og voru keppendur sem tóku þátt um 400 talsins allstaðar af landinu og einnig nokkrir erlendir skákmenn. Taflfélag Vestmannaeyja var með tvær sex manna sveitir, aðra í 3ju deild og hina í þeirri 4. Félagið tók þá ákvörðun af fjárhagslegum ástæðum fyrir þremur árum að byggja alfarið á innlendum skákmönnum sem eru allir félagsmenn í TV.

  Á myndinni eru frá vinstri; Karl Gauti Hjaltason, Ólafur Hermannsson, Arnar Sigurmundsson formaður TV, Stefán Gíslason og Einar Sigurðsson.

  Alls tóku 20 félagsmenn TV þátt í keppninni og tefldu frá einni til fjórar skákir hver um sig. Eftir fjórar umferðir er lið TV í 3ju deild í sjöunda sæti af 14, með tvo sigra og tvö töp og lið TV í fjórðu deild er í fimmta sæti af 14, einnig með tvo sigra og tvö töp. Arnar Sigurmundsson form. TV segir menn mjög sátta við stöðuna, en í mars 2019 verður mótið klárað, þegar síðustu þrjár umferðirnar verða. Sem fyrr sagði var lið TV blanda heimamanna og brottfluttra og vakti nokkra athygli að í liði Eyjamanna voru tveir núv. alþingismenn, Páll Magnússon og Karl Gauti Hjaltason auk eins fyrrum þingmanns, Lúðvík Bergvinsson og lögðu þeir sitt af mörkum fyrir góðu gengi sveitanna.

Árangur TV á Íslandsmóti skákfélaga 2018 þokkalegur

  Íslandsmót skákfélaga 2017-2018 fór fram eins og oft áður í Rimaskóla í Reykjavík. Þar er mjög jákvætt viðmót skólastjórnenda og annara sem komu að framkvæmd mótsins til skáklistarinnar.  

Fyrri hluti mótsins, fjórar umferðir fóru fram 20.-22. október 2017 og seinni hlutinn, þrjár umferðir 2.-3 mars 2018. Taflfélag Vestmannaeyja sendi tvær sveitir til keppni. TV vann sig upp í 3. deild vorið 2017 og þá var ákveðið að senda einnig sveit í 4. deild. Ljóst var að á brattann var að sækja í 3ju deild, þar sem fyrir voru í fleti öflugar skáksveitir af höfuðborgarsvæðinu og af landsbyggðinni. Teflt er á sex borðum í 3. og 4. deild og til að manna tvær sveitir þurfa að vera til staðar liðlega 20 keppendur vegna forfalla og fjarveru keppenda. Ólafur Hermannsson var liðsstjóri TV í 4. deild  og Arnar Sigurmundsson, form. TV var liðsstjóri í 3. deild.

Eftir fyrrihluta keppninnar var útlitið ekki gott í 3ju deild, en þar voru 14 skáksveitir, þrjú lið falla og TV var þá í 12. sæti, fallsæti. Í seinni hluta mótsins í mars sl. gekk sveitinni betur og enduðum við í 10. sæti eftir spennandi lokaumferðir. Þessi niðurstaða var sannarlega ákveðinn varnarsigur, en mikil forföll keppenda höfðu sín áhrif á árangur liðsins.

Sveit TV í 4. deild gekk öllu betur, en þar voru 18 skáksveitir. Eftir fyrrihlutann var TV í 6. sæti og þegar upp var staðið frá skákborðum í mars 2018 var sveitin í 10. sæti sem er mjög þokkalegur árangur.

Taflfélag Vestmanaeyja þakkar félagsmönnum sínum fyrir þáttökuna í mótinu. Það reyndist meira púsluspil en reiknað var með að ná saman fullskipuðum liðum í hverja umferð en það tókst og komu um 25 félagar í TV við sögu og eru þeir ýmist búsettir í Eyjum eða á fastalandinu.

Sigurjón skákmeistari Vestmannaeyja 2018

  Skákþing Vestmannaeyja 2018 hófst 17. janúar sl. og voru tefldar sjö umferðir ( einföld umferð) í skáksetri TV við Heiðarveg.  Sigurjón Þorkelsson, margreyndur Vestmannaeyjameistari vann mótið og hlaut  6 ½  vinninga.  Í öðru sæti varð Einar B. Guðlaugsson með 5 ½ vinninga og í 3.-4. sæti Þórarinn Ingi Ólafsson og Arnar Sigurmundsson með 5 vinninga. Í fimmta sæti varð Páll Árnason fyrrum múrari með 3 vinninga.  Mótið tókst vel og voru teflar 1-2 umferðir á viku.

Taflfélagið upp í 3 deild !

 Á Íslandsmóti skákfélaga sem lauk í mars síðastliðnum komst Taflfélag Vestmannaeyja loks upp úr 4 deild og mun tefla í 3 deild í haust. Keppendur á mótinu voru um 300-350 talsins á aldrinum 5-84 ára og komu víðsvegar að af landinu. Telft var í fjórum deildum og voru sjö umferðir nema í efstu deild. Taflfélag Vestmannaeyja dró sig út úr efstu deild vorið 2015 vegna mikils kostnaðar, en félagið var m.a. með erlenda stórmeistara á sínum snærum og barðist í mörg ár um efstu sætin og lenti t.a.m. fjórum sinnum í öðru sæti á 10 árum.

 TV fór því aftur á byrjunarreit í 4. deild, en fjórtán lið voru í deildinni og komust þrjú efstu liðin upp í 3. deild. Sveit Taflfélags Vestmannaeyja varð í 2.-3 sæti ásamt félögum okkar í Skákfélagi Sauðárkróks og voru liðin jöfn með 11 stig af 14 mögulegum.  B- sveit Víkingaklúbbsins varð efst með 14 stig eða fullt hús. TV  vann í 5 skipti, gerði 3-3 jafntefli við Sauðárkrók, en tapaði 2-4 á móti Víkingaklúbbnum. Teflt var á sex borðum í hverri umferð. Bestum árangri í liði TV náðu Lúðvík Bergvinsson sem var með fullt hús í fjórum skákum, Alexander Gautason hlaut 5,5 vinninga af 6, Kristófer Gautason 4,5 vinninga af 5 og Ægir Páll Friðbertsson 2,5 vinninga af 3 mögulegum. Alls komu 12 skákmenn frá TV við sögu á Islandsmótinu að þessu sinni.  

  TV hyggst vera með tvær sveitir á Íslandsmóti skákfélaga í haust, í 3. og 4. deild og munu  um 20  keppendur koma að því verkefni að sögn Arnars Sigurmundssonar formanns Taflfélags Vm., en jafnframt lýsti hann ánægju með árangurinn á mótinu en hann ásamt Karli Gauta Hjaltasyni voru liðstjórar TV. Vonast er til að gamlir félagar TV á höfuðborgarsvæðinu munu ganga til liðs við félagið í einhverjum mæli í sumar.

Sigurjón skákmeistari Vestmannaeyja 2017

  Hinn 8. janúar hófst skákþing Vestmannaeyja 2017 og lauk mótinu í gærkvöldi 9. febrúar. Þáttakendur voru sex og tefldar voru tvær umferðir með 60 mínútna umhugsunartíma auk 30 sek. á hvern leik.

  Sigurvegari og Skákmeistari Vestmannaeyja 2017 varð Sigurjón Þorkelsson, en hann hlaut 9 vinninga af 10 mögulegum.  Í öðru sæti varð Einar B. Guðlaugsson með 7,5 vinninga og í þriðja sæti varð Stefán Gíslason fráfarandi meistari með 5 vinninga.

  Sigurjón er nú meistari í 12 sinn, en hann varð fyrst Skákmeistari Vestmannaeyja 1986 og síðast 2006 og hefur orðið meistari oftar en nokkur annar.  Einar B. Guðlaugsson varð Skákmeistari Vestmannaeyja á árunum 1965 til 1968 eða 4 ár í röð. Aðrir keppendur voru Arnar Sigurmundsson, Gísli Eiríksson og Þórarinn I. Ólafsson, allt gamalkunnar kempur úr félaginu.

Mótstafla

 

		SÞ	EBG	SG	AS	ÞIÓ	GEi	Alls
1	Sigurjón	X	1 / 1	1/ 1	1 / ½	1 / ½	1 / 1	9
2	Einar	0 / 0	X	1 / 1	1 / ½	1 / 1	1 / 1	7,5
3	Stefán	0 / 0	0 / 0	X	1 / ½	½ / 1	1 / 1	5
4	Arnar	0 / ½	0 / ½	0 / ½	X	½ / ½	1 / 1	4,5
5	Þórarinn	0 / ½	0 / 0	½ / 0	½ / ½	X	1 / 1	4
6	Gísli	0 / 0	0 / 0	0 / 0	0 / 0	0 / 0	X	0

 

Jólamótið verður 28. desember

  Jólahraðskákmót Vestmannaeyja fer fram miðvikudaginn 28. desember kl. 19.30 í Skáksetrinu að Heiðarvegi 9a í Vestmannaeyjum húsnæði TV. Tímamörk 5 mínútur og 3 sek. á leik. 

Skákþing Vestmannaeyja hefst 8 janúar

Skákþing Vestmannaeyja 2017 hefst sunnudaginn 8. janúar nk. kl. 14.00 og lýkur í lok janúar og fer fram í Skáksetrinu að Heiðarvegi 9a í Vestmannaeyjum. Núverandi skákmeistari Vestmannaeyja er Stefán Gíslason.

Tímamörkin verða 60 mínútur á keppenda auk 30 sekúntna á hvern leik. Mótið er komi ðá mótatöflu SÍ fyrir 2017.