Helgi Ólafsson sigraði á afmælismóti TV.

  Afmælismót Taflfélags Vestmannaeyja sem haldið var í tilefni 90 ára afmælis TV fór fram um síðustu helgi. Mótið var mjög vel skipað og keppendur voru  24, þar af tíu félagsmenn í TV. Meðal keppenda voru fimm skákmeistarar með alþjóðlega titla, þar af einn stórmeistari. Keppt var í skáksetri TV við Heiðarveg og var mótið svokallað atskákmót, umhugsunartími 20 mín. á skák á hvorn keppenda og 5 sek. til viðbótar fyrir hvern leik. Hver umferð tók um 60 mínútur. Mótið hófst kl. 12.00 á laugardag og voru þá tefldar fimm umferðir. Keppendum var boðið í rútuferð um Heimaey í lok fyrri dags. Á sunnudag voru tefldar fjórar umferðir og lauk mótinu síðdegis með verðlaunaafhendingu. Landsbankinn var helsti styrktaraðili afmælismótsins. Sigurvegari á afmælismótinu varð Helgi Ólafsson, stórmeistari með 8 vinninga af níu mögulegum. Í 2.-3. sæti urðu Davíð Kjartansson og Oliver Jóhannesson, báðir FIDE meistarar með 6,5 vinninga. Í 4.-6. sæti urðu Ólafur Hermannsson TV, Sævar Bjarnason alþjóðlegur meistari og Stefán Bergsson, allir með 5,5 vinninga.

  Í mótslok  flutti sigurvegarinn Helgi Ólafsson ávarp og sagði frá uppvaxtarárum sínum í skákinni í Eyjum, 1968-1973. Fjölskylda Helga bjó hér um árabil og faðir hans Ólafur Helgason var  bankastjóri útibús Útvegsbanka Íslands í Eyjum á miklum umbrotatímum í tengslum við eldgosið 1973 og uppbygginguna í kjölfar þess. Helgi hefur ávallt verið í góðu sambandi við sitt uppvaxtarfélag í skákinni og oft á tíðum teflt fyrir félagið á Íslandsmóti skákfélaga.

  Arnar Sigurmundsson formaður TV lýsti ánægju sinni með framkvæmd mótsins og þakkaði Vestmannaeyjabæ og fjölmörgum fyrirtækjum fyrir stuðninginn við félagið á liðnum árum. Þá sagði hann mjög ánægjulegt að nú er hafin á ný formleg skákkennsla í Grunnskóla Vestmannaeyja og kennari við GRV orðinn skákkennari. Nú er unnið að undirbúningi að skákkennslu í Hamarsskóla, en margir skólar á höfuðborgarsvæðinu og úti á landi eru með skákkennslu á námsskrá í ákveðnum árgöngum.

Skrár tengdar þessari bloggfærslu:

• tv-fyrsti-leikur.jpg

Skráning á afmælismótið hafin á skak.is

Merki 90 ára afmælismóts Taflfélags Vestmannaeyja.

  Helgina 10.-11. september 2016 fer fram atskákmót í Eyjum í tilefni af  90 ára  afmæli Taflfélags Vestmannaeyja.

  Keppendur verða úr Eyjum og á fastalandinu. Reiknað er með að keppendur ofan af landi komi með Herjólfi laugardaginn 10. september, frá Landeyjahöfn kl. 09.45 og til Eyja um kl. 10.30.  Akstur frá Reykjavík til Landeyjahafnar tekur tæplega 2 klst. og þurfa farþegar og ökutæki að vera mætt 30 mín. fyrir brottför Herjólfs frá Landeyjahöfn.  Algengt er að farþegar geymi ökutæki sín á bílastæðum í Landeyjahöfn meðan á dvöl þeirra í Eyjum stendur.

  Fyrsta  ferð til Landeyjahafnar frá Eyjum að loknu skákmótinu er kl. 18.30 sunnudaginn 11. sept og nú síðasta þann dag kl. 21.00 um kvöldið. Mæting um borð 30 mín. fyrir brottför.

  Tefldar verða níu umferðir, umhugsun 20 mín. á skák auk 5 sek. á hvern leik. Reiknað er með að umferðin taki um 60 mín. Skákstjóri verður Stefán Bergsson.

Laugardagur 10. sept. 2016

Kl. 12.00 – 17.00  Tefldar verða fimm umferðir fyrri daginn.

Kl. 17.00 – 18.00   Skoðunarferð með rútu um Heimaey.

Sunnudagur 11. sept. 2016

Kl. 12.00 - 16.00   Tefldar verða fjórar umferðir seinni daginn.

Kl. 16.30 – 17.00   Mótsslit og verðlaunahending.

Ekkert þátttökugjald á atskákmótinu og í skoðunarferðina.

  Fyrstu verðlaun verða 75 þús. kr., önnur verðlaun 50 þús. kr. og þriðju verðlaun 25 þús. kr. Landsbankinn er helsti stuðningsaðili mótsins.

  Nánari upplýsingar um ferðir til  og frá Eyjum á  herjolfur.is og gistingu í Eyjum  á visitvestmannaeyjar.is   

Skráning þátttakenda á 90 ára afmælismótið  fer fram á Skák.is.

Upplýsingar um þegar skráða keppendur má finna hér. 

Afmælisnefnd Taflfélags Vestmannaeyja

90 ára afmælismót Taflfélags Vestmannaeyja

  Hinn 26. ágúst 2016 verða 90 ár síðan Taflfélag Vestmannaeyja var stofnað og af því tilefni verður blásið til veglegs afmælismóts helgina 10 til 11. september n.k.

  Öllum skákunnendum er heimil þáttaka í mótinu og reiknað er með auðveldum samgöngum þessa daga til Eyja. En Herjólfur gengur laugardaginn 10. sept. frá Landeyjahöfn kl. 09.45 og komið er til Eyja um kl. 10.30. Akstur frá Reykjavík til Landeyjahafnar tekur tæplega 2,0 klst. og þurfa farþegar og ökutæki að vera mætt 30 mín. fyrir brottför frá Landeyjahöfn. Einnig er unnt að geyma ökutæki á bílastæðum í Landeyjahöfn meðan á dvalið er í Eyjum.

Eftir að skákmótinu líkur er næsta ferð til Landeyjahafnar kl. 18.30 sunnudaginn 11. sept. og sú síðasta þann dag kl. 21.00 um kvöldið.

Tefldar verða níu umferðir, umhugsun 20 mín. á skák auk 5 sek. á hvern leik.

DAGSKRÁ AFMÆLISMÓTSINS

Laugardagur 10. sept. 2016

Kl. 12.00 – 17.00  Fyrstu 5 umferðir afmælismótsins tefldar.

Kl. 17.00 – 18.00  Skoðunarferð með rútu um Heimaey.

Sunnudagur 11. sept. 2016

Kl. 12.00 - 16.00   Síðustu 4 umferðir afmælismótsins.

Kl. 16.30 – 17.00   Mótsslit og verðlaunafhending.

Ekkert þátttökugjald er á atskákmótið né í skoðunarferðina.

Fyrstu verðlaun verða 75 þús. kr., önnur verðlaun kr. 50 þús. kr. og þriðju verðlaun kr. 25 þús. kr.

Nánari upplýsingar um ferðir til og frá Eyjum er að finna á herjolfur.is og gistingu í Eyjum á visitvestmannaeyjar.is  Skráning þátttakenda á mótið á netfangið [e-mail]

Afmælisnefnd Taflfélags Vestmannaeyja

Páskaeggjamót TV 2016

  Páskahraðskákmót TV 2016 fór fram laugardaginn 26. mars og hófst kl.14:00 í skáksetrinu við Heiðarveg.

  Alls mættu 11 keppendur til leiks og var tefld einföld umferð, með tímamörkum 5mín + 3sek. á leik.

  Tefldar voru 11 umferðir, 10 skákir með þáttöku skottu.

  Jafnir og efstir í fyrsta sæti urðu Sigurjón Þorkelsson og Einar Sigurðsson með 10 vinninga og töpuðu þeir eingöngu einni skák. Þeir þurftu því að tefla úrslitaskák um sigurlaunin og hafði Sigurjón þá betur.

  Í 3ja sæti varð Einar B. Guðlaugsson með 6,5 vinn., en síðan komu nokkrir með 6 vinninga og loks aðrir á bilinu 3,0-5,5 vinninga.

  Í mótslok fékk Sigurjón afhent stórt og myndarlegt páskaegg til eignar, en aðrir keppendur agnarsmá gullegg.

  Mótið endaði á því að keppendur lásu málshættina, hver úr sínu eggi.

  Fyrirhugað er að halda Hraðskákmeistaramót Vestmannaeyja 2016 í apríl eða maí nk. og verður það auglýst sérstaklega. 

  Á næstu fimmtudagskvöldum kl. 20.00 verða skákæfingar í skáksetrinu við Heiðarveg.

Skákþing Vestmannaeyja - heildarúrslit

  Nú fyrir stuttu lauk Skákþingi Vestmannaeyja, eins og greint hefur verið frá hér á síðunni og Stefán Gíslason er nýkrýndur Skákmeistari Vestmannaeyja.

  Hér er lokastaðan í töflu :

Skákþing Vestmannaeyja 2015

 

	SG	SÞ	EG	ÞÓ	AS	GE	Vinn.
Stefán Gíslason	X	1	½	1	½	1	4
Sigurjón Þorkelsson	0	X	1	½	1	1	3,5
Einar B. Guðlaugsson	½	0	X	1	1	1	3,5
Þórarinn I. Ólafsson	0	½	0	X	1	1	2,5
Arnar Sigurmundsson	½	0	0	0	X	1	1,5
Gísli Eiríksson	0	0	0	0	0	X	0

Stefán Gíslason skákmeistari Vestmannaeyja 2015

Nú er nýloknu Skákþingi Vestmannaeyja 2015.

Hinn gamalkunni skákmaður, Stefán Gíslason sigraði og er því Skákmeistari Vestmannaeyja 2015. Stefán hefur lengi teflt með félaginu og tekið þátt í flestum mótum þess síðustu áratugi, en þetta er í fyrsta sinn sem hann hlýtur hinn eftirsótta titil. Stefán hlaut 4 vinninga af 5 mögulegum og varð einn efstur á skákþinginu.

Keppendur á Skákþinginu að þessu sinni voru 6, en auk Stefáns tóku þátt þeir Sigurjón Þorkelsson, Þórarinn I. Ólafsson, Arnar Sigurmundsson, Einar B. Guðlaugsson og Gísli Einarsson, en flestir þessir eru gamalkunnir skákmenn í félaginu.

Í 2-3 sæti urðu þeir Sigurjón og Einar, jafnir með 3,5 vinninga.

Stefán er vel að titlinum kominn, enda vel að sér í skákfræðunum, en það er kannski hin eðlislæga hógværð Stefáns sem veldur því að hann hefur ekki unnið þennan titil fyrir löngu síðan. Um ævi og störf Stefáns má lesa á: http://www.heimaslod.is/index.php/Stef%C3%A1n_G%C3%ADslason

90 ára afmælismót TV 9.-11. september 2016

  Taflfélag Vestmannaeyja verður 90 ára í lok ágúst á næsta ári, en það var stofnað 26. ágúst 1926. Það er því með elstu starfandi taflfélögum landsins og eitt elsta tómstundafélagið í Eyjum. 

  Stjórn félagsins hefur ákveðið að halda veglegt afmælismót af þessu tilefni helgina 9.- 11. september 2016 í Vestmannaeyjum og bjóða velunnurum félagsins, Eyjamönnum og skákmönnum yfirleitt upp á skemmtilegt mót og hugsanlega eitthvað fleira í tilefni af þessum merku tímamótum í sögu félagsins og Vestmannaeyja.

  Undirbúningsnefnd 90 ára afmælismótsins hefur þegar fundað og undirbúningur er að fara á fullt skrið.

Skákþing Vestmannaeyja 2015

Nú líður senn að því að Skákþing Vestmannaeyja 2015 verður haldið í Vestmannaeyjum. Reiknað er með því að það hefjist í lok október og standi megnið af nóvembermánuði. Að þessu sinni gæti borið til tíðinda, þar sem ýmsir gamlir meistarar hafa sýnt áhuga á að taka þátt, þ.á.m. Arnar Sigurmundsson, Einar B. Guðlaugsson, Sigurjón Þorkelsson og Ægir Páll Friðbertsson að ónefndum Stefáni Gíslasyni og Þórarni Inga Ólafssyni. Á síðasta ári féll keppnin niður, en árið 2013 sigraði Nökkvi Sverrisson og er hann því enn titilhafi. Fyrst var keppt um titilinn 1926 og sigraði þá Ólafur Magnússon frá Sólvangi. Sá sem oftast hefur orðið meistari er Sigurjón Þorkelsson eða 11 sinnum, en næstir koma þeir Kári Sólmundarson, 9 sinnum, Björn Ívar Karlsson, 5 sinnum, en þeir Einar B. Guðlaugsson, Sverrir Unnarsson og Arnar Sigurmundsson hafa unnið titilinn 4 sinnum hver.

Lengstur tími frá því sami maður vann titilinn fyrst og síðan aftur er hjá Sigurjóni Þorkelssyni, eða fyrst 1986 og síðast 2006 eða 21 ár, næstur kemur Arnar Sigurmundsson,(fyrst 1964 og síðast 1979, eða 15 ár) síðan kom tveir sem hafa gert þetta á áratug, þeir Kári Sólmundarson (1975 og 1985) og Börn Ívar Karlsson (2001 og 2011).

Þrír menn hafa unnið titilinn fjórum sinnum í röð, en það eru þeir Einar B. Guðlaugsson 1965-68, Kári Sólmundarson 1975-78 og Björn Ívar Karlsson 2008-11.

Gaman er að segja frá því að meðal meistara má sjá nokkur skyldmenni, t.d. Björn Ívar yngri og eldri, en sá yngri er sonarsonur þess eldri, einnig má finna þarna feðgana Sverri Unnarsson og Nökkva Sverrisson.  Margt fleira og lista yfir titilhafa má lesa á hinum frábæra vef um Vestmannaeyjar; Heimaslóð, undir Taflfélagi Vestmannaeyja; http://www.heimaslod.is

Arnar aftur formaður eftir 53 ár

  Hinn 5. september s.l. fór fram aðalfundur Taflfélags Vestmannaeyja. Fram kom að afkoma félagsins hefur verið góð undanfarin ár, en mest púður hefur farið í þátttöku félagsins á íslandsmóti skákfélaga og höfum við verið þar með vaska sveit innlendra og erlendra skákmanna á okkar snærum undir öruggri stjórn liðsstjóra okkar, Þorsteins Þorsteinssonar. Þrátt fyrir alla þessa viðleitni með gífurlega sterkum skákmönnum, þá tókst okkur ekki að landa titlinum en urðum 4 sinnum í 2 sæti og jafnoft í því þriðja síðustu 11 ár, en margir myndu telja góðan árangur. Á engan er hallað þó segja megi að hitann og þungann af A-sveitinni hafi Þorsteinn (Stone) borið og er honum þakkað góð störf fyrir félagið. Þá er ekki úr vegi að þakka hollum liðsmönnum félagsins, sem nú eru horfnir til annarra félaga, en þetta eru þeir ; Helgi Ólafsson GM, Björn Ívar Karlsson, Ingvar Þór Jóhannesson, Henrik Danielsen GM, Sigurbjörn Björnsson, Kristján Guðmundsson og Björn Freyr Björnsson. Takk strákar, við tökum þetta síðar !

  Það var þó alltaf jafnljóst að sinna þyrfti starfinu í heimahögunum, reyna að byggja upp starfið í Eyjum, lagfæra húsnæði félagsins og greiða niður lán á húsnæðinu, en allt þetta hefur að undanförnu setið á hakanum.

  Það var því tímamótaákvörðun sem tekin var í sumar að draga lið okkar úr keppni í 1 deild og bakka "down to the basics" og senda skraplið í 4 deild. Það tókst ágætlega og ánægjulegt að nokkrir strákar sem ekki hafa teflt lengi létu sjá sig og stóðu sig bara fjári vel.

  Á aðalfundinum voru lagðar línur í þessa veru. Þegar kom að stjórnarkjöri kom fram að formaðurinn, Ægir Páll gæfi ekki kost á sér áfram, þar sem hann er að flytjast búferlum frá Eyjum. Formaður var því kjörinn, Arnar Sigurmundsson sem hefur verið skoðunarmaður reikninga í einhver ár eða áratugi. Það sem er athyglisvert við formannskjör Arnars er að hann var síðast kjörinn formaður í félaginu haustið 1962 eða fyrir 53 árum síðan og er líklega vandfundið það félag sem hefur á að skipa jafn dyggum félagsmönnum. Gott er til þess að vita að fleiri formenn frá sjöunda áratugnum eru enn virkir í félaginu,t.d. bæði Andri Valur Hrólfsson og Ólafur Hermannsson og enn fleiri frá áttunda áratugnum svo ekki þarf að leita langt með forystusveit á komandi árum.

Taflfélag Vestmannaeyja í 2 sæti í 4 deild

 Þá er lokið fyrri umferð Íslandsmóti skákfélaga, sem fram fór um helgina.

  Eins og kunnugt er þá dró TV sig út úr 1 deild í vor og samkvæmt því urðum við að hefja leikinn að nýju í 4 deild.

  Ánægjulegt var að sjá hversu margir gamlir félagar vildu leggja félaginu lið og mættu til leiks, þrátt fyrir að nokkrir kunnir félagar gátu ekki verið með okkur að þessu sinni, aðallega vegna Lundaballsins í Eyjum, sem var þessa sömu helgi og mætti stjórn Skáksambandsins huga að því við skipulagningu í framtíðinni.

  Alls eru það 17 sveitir sem keppa í 4 deild. Eftir fyrstu fjórar umferðirnar erum við í 2 sæti með 7 stig og 18 vinninga, en efstir eru Hrókar alls fagnaðar sem við mætum í 5 umferð í byrjun mars á næsta ári og þar verður án efa hart barist á hverju borði.

Staða efstu liða í 4 deild:
1. Hrókar alls fagnaðar        4 0 0   8 stig  20,5 vinn.
2. Taflfélag Vestmannaeyja  3 1 0   7 stig  18,0 vinn.
3. Breiðablik a sveit            3 1 0   7 stig  15,0 vinn.
4. Vinaskákfélagið b sveit   3 0 1   6 stig  19,0 vinn.
5. Skákfélag Sauðárkróki    3 0 1   6 stig  17,5 vinn.

  Alls voru það 12 manns sem tóku þátt fyrir TV, en þeir voru Arnar Sigurmundsson, Lúðvík Bergvinsson, Þórarinn I. Ólafsson, Stefán Gíslason, Óli Árni Vilhjálmsson, Daði Steinn Jónsson, Karl Gauti Hjaltason, Alexander Gautason, Sindri Freyr Guðjónsson, Valur Marvin Pálsson, Jón Ragnarson og Davíð Árnason.

  Valur Marvin stóð sig afar vel og sigraði í öllum sínum fjórum skákum. Þórarinn fékk 3 vinninga af 4, Stefán 2,5/3, Alexander 2/2 og Arnar 1,5/2. Þá unnu Sindri Freyr, Daði Steinn, Jón Ragnarsson og Karl Gauti allir andstæðing sinn.

  Pislahöfundi finnst tími til komin að skáksambandsforystan fari að huga að hentugra husnæði undir þessa stærstu skákkeppni hér innanlands, það er fremur óvistlegt í gluggalausum kjallaranum í Rimaskóla.