Björn Ívar sigraði Volcano mótið.

  Í dag, gamlársdag fór fram hið árlega Volcano skákmót á Veitingastaðnum Volcano í Vestmannaeyjum.  Að þessu sinni var mótið til styrktar Steingrími Jóhannessyni og rann öll innkoma mótsins kr. 20.000 honum til styrktar.

  Alls mættu 16 keppendur til leiks og voru tefldar 9 umferðir, 5 mínútna skákir.  Nokkrir gamlir félagar mættu, t.d. Ágúst Már Þórðarson, sem teflir nú á Austurlandi, Lúðvík Bergvinsson félagi okkar í Reykjavík, Mikhael Starosta, nýr félagi í TV að ógleymdum sendiherra okkar á höfuðborgarsvæðinu, Einari K. Einarssyni og þá komu líka þeir Eyþór og Jörgen.

  Þá mætti Grímhildur, völva félagsins og sást hún á löngu spjalli við Einar K. sem mun hafa fengið skíra sýn á næsta ár hjá sér og á eftir sagðist hann vera búin að breyta utanlandsferðinni í sumar eftir leiðbeiningum Hildu.  Grímhildur mun nú vera að skrifa nákvæma spá fyrir árið 2012 sem mun verða birt á fyrstu dögum nýja ársins og þá munu margir fá það óþvegið og óþegið ef svo ber undir.  Hilda gamla, eins og hún er kölluð sagðist hafa haft mikla ánægju af því að fylgjast með mótinu og sérstaklega þar sem verið sé að vinna að góðu málefni.  Hún sagði að í kvöld yrði gott veður til að skjóta upp flugeldum í Eyjum, en aðspurð sagðist hún sjálf bara nota heimatilbúin trix, hún sendi á loft nornaelda, kveikti galdrabrennu í Stafsnesi í kvöld og kallaði fram eldglæringar eftir því sem hún nennti.  Í nótt væri sérstök galdastefna hjá sér í Dalfjallinu og myndu kerlingar mæta hvaðanæva af norðurlöndunum, vinkonur hennar til margra ára.

Nánari Úrslit:

Mótið í heild.
1. Björn Ívar Karlsson 8,5 vinningar
1. Einar K. Einarsson 8,5 vinningar
3. Sverrir Unnarsson 6 vinningar
4. Lúðvík Bergvinsson 5 vinn.
4. Nökkvi Sverrisson 5 vinn.
4. Þórarinn Ólafsson 5 vinn.
4. Stefán Gislason 5 vinn.

Yngri en 15 ára.
1. Kristófer Gautason 4,5 vinn.
2. Daði Steinn Jónsson 4 vinn.
3. Sigurður Magnússon 3 vinn.

Yngri en 12 ára.
1. Sigurður Magnússon 3 vinn.
1. Jörgen Freyr Ólafsson 3 vinn.
3. Eyþór Daði Kjartansson 2 vinn.

Volcano mótið til styrktar Steingrími.

  Minnum á hið árlega Volcano skákmót, sem fer fram á Gamlársdag kl. 13:00 á veitingastaðnum Volcano við Strandveg.  Allir hjartanlega velkomnir.  Mótið verður á léttu nótunum og verða tefldar 5 mínútna skákir, 7, 9 eða 11 umferðir eftir þátttöku.

  Þátttökugjald á mótinu verður kr. 1.000 á mann og rennur allur ágóði til styrktar Steingrími Jóhannessyni og fjölskyldu, sem berjast við erfið veikindi.

Spá völvu TV fyrir 2012

  Hér birtist svo spádómar Grímhildar, völvu Taflfélags Vestmannaeyja fyrir árið 2012, sem svo margir hafa beðið eftir :

  Hver verður næsti skákmeistari Vestmannaeyja ?
  "Ég sé að þetta verður hörkuspennandi mót, en að lokum mun Einar Guðlaugsson standa uppi sem sigurvegari, en hann kemur sterkur inn í spánna að þessu sinni".  Rétt er að geta þess að Einar varð síðast skákmeistari Vestmannaeyja á sjöunda áratug síðustu aldar svo ef spáin reynist rétt er þarna um stórmerkilegan atburð að ræða í íslenskri skáksögu.

  Hvernig mun taflmennskan vera í Eyjum á næstunni ?
  "Já, það er vaxandi gróska, Nökkvi og ungu strákarnir munu standa sig vel og stúlkunni fer fram.  Stebbi Gilla mun verða óbrotinn allt þetta ár og verður með í deildó.  Þórarinn á eftir að tefla meira með ykkur, en Sverrir og formaðurinn munu ekki bæta miklu við sig.  Svo sé ég einhverja múrara sem eru mikið hér í Eyjum, en ég get ekki alveg staðsett þá á mótum félagsins".

  Verða einhverjar mannabreytingar í sveitum TV ?
  "Já, það verður heiklmikið að gerast þar, liðsstjórinn mun elta uppi hina ólíklegustu skákmenn og B sveitin mun fá liðsauka, en það verða líka einhverjir sem munu yfirgefa skútuna".

  Hvaða félag vinnur Íslandsmót skákfélaga ?
  "Ég sé nú ekki alveg hvað þetta félag heitir, en það eru staflar af peningum í kringum þá, þessa pilta og þeir eru með bikarinn í sínum höndum, það er ljóst".

  En Taflfélag Vestmannaeyja ?
  "Þeir eru með verðlaunapeninga, en ekki bikar, svo þeir hljóta að ná 2 eða 3 sæti".  "Ég sé að hópurinn ykkar er skipaður vænstu piltum og einhver talar á framandi tungumáli, en það gera þeir líka í hinum liðunum.  Liðsstjórinn er ansi hreint myndarlegur, ég minnist þess ekki að hafa séð hann hér í Eyjum síðan ég flutti hingað".

  En með okkar sterkustu menn ?
  "Helgi Ólafs. mun bæta við ef eitthvað er, eftir frábært ár 2011, þar sem hann hefur eiginlega komið mest á óvart af öllum íslenskum skákmönnum.  Björn Ívar verður með á fleiri mótum en nokkru sinni og stendur sig afar vel. Henrik mun eflast á árinu".

  Verður eitthvað að gerast hjá Skáksambandinu ?
  "Ég sé að hinn fjallmyndarlegi og bráðskemmtilegi Maggi Matt. mun sækjast eftir æðstu metorðum annað hvort í SÍ eða þá Vinjum, ég sé ekki alveg á hvaða vettvangi þetta er".

  Eitthvað að lokum, Hilda gamla ?
  "Já, hvar skrái ég mig í TV ?"

Volcano mótið á gamlársdag.

  Á gamlársdag fer fram hið árlega Volcano skákmót í Vestmannaeyjum, en þetta mót er 4 ára gamalt og hefur verið haldið í samstarfi við Volcano veitingahúsið í Vestmannaeyjum.  Að venju eru allir velunnarar félagsins velkomnir og hefst það kl. 13:00 á veitingastaðnum Volcano við Strandveg í Vestmannaeyjum.  Verðlaun verða pizzuúttektir á veitingastaðnum og fleira.

  Að þessu sinni mun óvenjulegur gestur mæta á mótsstað, en það er völva Taflfélagsins, Grímhildur Þrúður Geirlaugsdóttir, kölluð Hilda gamla, en hennar sérgrein hefur verið í gengum tíðina að spá fyrir um eldsumbrot.

  Grímhildur er nýflutt til Eyja, býr í kofa sem hún leigir norðan í Dalfjalli og vinnur á vöktum í Vinnslustöðinni.  Aðspurð segist hún bæði vinna við fiskvinnslu og einnig í markaðsdeild félagsins með nýja afurð sem enn hefur ekki verið kvótasett, svokölluð  Pétursskip, en þau seljast grimmt á galdramarkaði í mið-evrópu, þar sem Hilda þekkir vel til.  Hún hafði samband við forsvarsmenn TV og taldi tilvalið og rétt að varpa fram spádómum sínum fyrir árið 2012 á Volcano mótinu, það væri auðvitað rétti vettvangurinn.  Rifja má upp í þessu sambandi að hún spáði fyrir um Eyjafjallajökulsgosið, Grímsvatnagosið, Kötlugosið 1918 að ógleymdu gosinu í Öræfajökli 1362.

  "Nei ég kann ekkert að tefla, en ég sé alveg hver vinnur mótið, það liggur í augum uppi og er alveg kristaltært hér í kúlunni minni".  Ekki vildi hún gefa það upp, sagði að þá yrðu hinir keppendurnir svo fíldir.  "En ég get sagt það að sigurvegarinn er vænsti piltur og árið 2012 mun verða honum happadrjúgt, bæði í einkalífinu og á skáksviðinu".  Aðspurð af SKÁKEYJUNNI hvernig stjórn TV muni reiða af í nánustu framtíð sagði hún "suss uss þeim gengur nú hvorki upp né niður í skákinni, en ég sé mikið af neftóbaki í kúlunni minni, þessir líka myndarmenn".  Restin af viðtalinu við Hildu birtist á morgun, en þar svarar hún mörgum lykilspurningum um framtíð TV og skákarinnar á Íslandi.

 Hilda gamla á Strandveginum í Eyjum fyrir framan Krónuna, vel tilhöfð á Þorláksmessugöngu sinni.

Sverrir vann MCIIL Jólamót TV

  Á jóladag fór fram 1148 (MCIIL eða MCXLVIII) Jólamót TV og varð sigurvegari að þessu sinni Sverrir Unnarsson sem vann alla andstæðinga sína og fékk veglegan pakka af jólakonfekti í verðlaun.  Að þessu sinni mættu níu keppendur, spariklæddir og fínir eftir venju þessa dags.  Tefldar voru 5 mínútna hraðskákir og höfðu ungu mennirnir þar nokkuð forskot á þá sem eldri eru og svifaseinni, allir nema Sverrir sem er í hörkuformi.

Sæti	Nafn	Vinn	SB
1	Sverrir Unnarsson	8	32,00
2	Nokkvi Sverrisson	7	24,50
3	Dadi Steinn Jonsson	5	14,50
4	Kristofer Gautason	4½	12,00
5	Einar Sigurdsson	4	11,50
6	Stefan Gislason	3½	8,00
7	Karl Gauti Hjaltason	3	6,50
8	Thorarinn I Olafsson	1	0,50
9	Hafdis Magnusdottir	0	0,00

Jólaskákmót TV á Jóladag.

  Eftir aldagamalli hefð verður Jólaskákmót TV haldið á Jóladag og hefst kl. 13:00.  Allir félagsmenn og aðrir velunnarar félagsins eru að venju velkomnir.  Jólakonfekt í verðlaun.

  Það er óþarfi að taka fram að þetta er eina skákmótið á landinu sem í boði er á jóladag og munu margir áhugasamir skákmenn með heimilisfesti uppi á fastalandinu hafa hugsað sér til hreyfings til þess að geta tekið í skák þegar jólasteikin kraumar notalega í vömbinni.  Þannig mun hafa heyrst að vinir vorir á hinu víð- og flatlenda Suðurlandi ætla að gera hópferð á mótið, enda lítið um að vera á tilbreytingarlausum sléttunum á þessum tíma árs.

  Margir fornleifafræðingar hafa leitast við að fastsetja hvenær Jólamótið var fyrst haldið og eru nýjustu fréttir þær að fundist hafa fornleifar í Herjólfsdal frá því fyrir landnám, þar sem rannsókn á tveimur beinagrindum hafa leitt í ljós að þær hafa setið við tafl þegar þær létust, enda biðskákir óvenju langar á þessum tíma og gátu tekið heilu og hálfu veturna.  Þá vakti það forvitni fornleifafræðinganna að annar skákmaðurinn hafði riddara falinn í annari hendinni.  Þormóður Skjaldarson fornleifafræðingur sagði í tilefni af þessum fundi í viðtali við SKÁKEYJUNA : "Ég tel fullvíst að þarna sé komið í ljós fyrsta svindlið í skáksögunni", og skýrði það nánar "ég tel að hann hafi ætlað að læða manninum inn á borðið þegar andstæðingur hans dottaði yfir leiknum, enda gjóir hann augunum lymskulega í átt að andstæðingi sínum".

 Gröf fyrsta skáksvindlarans í Herjólfsdal.  Vel má greina riddara í hægri hendi beinagrindarinnar.  Fæturnir neðst á myndinni tilheyra Þormóði Skjaldarsyni fornleifafræðingi.

Hraðskákmót á miðvikudaginn.

  Næsta miðvikudag verður haldið hraðskákmót og hefst taflmennskan kl. 19:30.  Allir velkomnir.

Nökkvi sigraði í hnífjöfnu Haustmóti TV.

  Í gær lauk Haustmóti TV þegar Kristófer og Nökkvi tefldu sín á milli, en þeirri skák hafði verið frestað um nokkurt skeið.  Kristófer, sem hafði hvítt sigraði Nökkva.
  Mótið reyndist vera afar jafnt og feðgarnir Nökkvi og Sverrir enduðu með 4 vinninga, en sonurinn Nökkvi telst sigurvegari á stigum.  Aðrir feðgar urðu jafnir í 3 sæti, en þar var faðirinn ofar syninum á stigum.  Þó nokkuð var um óvænt úrslit í mótinu, þegar stigalægri menn unnu sigur á þeim stigahærri og munar ekki nema 0,5 vinningi á efstu fjórum mönnum og 1 vinningi á efstu sex.

Haustmót TV 2011 - Lokastaða:

Nr.	Nafn	Stig	1	2	3	4	5	6	7	Vin
1	Nökkvi Sverrisson	1951	*	1	0	0	1	1	1	4
2	Sverrir Unnarsson	1901	0	*	0	1	1	1	1	4
3	Karl Gauti Hjaltason	1538	1	1	*	0	½	0	1	3,5
4	Kristófer Gautason	1580	1	0	1	*	0	½	1	3,5
5	Stefán Gíslason	1684	0	0	½	1	*	½	1	3
6	Daði St. Jónsson	1633	0	0	1	½	½	*	1	3
7	Hafdís Magnúsdóttir	1078	0	0	0	0	0	0	*	0

Nökkvi efstur á hraðskákmóti

Nökkvi varð efstur á hraðskákmóti í kvöld. Hann vann alla andstæðinga sína en næstur komu Sverrir og í þriðja varð Kristófer.

 

 

	Nafn	1	2	3	4	5	6	Vinn
1	Nökkvi Sverrisson	*	2	2	2	2	2	10
2	Sverrir Unnarsson	0	*	2	2	2	2	8
3	Kristófer Gautason	0	0	*	2	1	2	5
4	Daði Steinn Jónsson	0	0	0	*	2	2	4
5	Karl Gauti Hjaltason	0	0	1	0	*	2	3
6	skotta	0	0	0	0	0	*	0

 

Hraðskákmót í kvöld

Í kvöld verður tefld hraðskák með 5 mínútna umhugsunartíma. Tefldar verða 7-9 umferðir og mun taflmennskan hefjast kl. 19:30