Tómas Björnsson gengin í raðir TV.

  Nú í vikunni gekk Tómas Björnsson, Vík, yfir í Taflfélag Vestmannaeyja, hann er með 2160 Íslensk stig og á skráðar 943 skákir og því með reyndustu skákmönnum hérlendis.

  Við bjóðum Tómas velkominn í félagið en hann verður öflugur liðsmaður nú þegar við leggjum kapp á að verða sterkir í 1 deildar keppninni í haust og ekki síður að freista þess að koma B-sveitinni upp í 3 deild.

Skáksetrið komið í sumarbúning.

  Þá hefur húsnæði Taflfélags Vestmannaeyja að Heiðarvegi 9 loksins verið málað og ku orðið mikill sómi að.  Um síðustu helgi var haldin Goslokahátíð í Vestmannaeyjum og þar sem húsið stendur í miðbænum var lagt kapp á að klára málunina fyrir þá helgi, sem tókst.

  Höfðu margir gestir á hátíðinni orð á þessari breytingu við félagsmenn.

  Verkstjórn með þessu verki var í höndum Þórarins I. Ólafssonar og naut hann aðstoðar Stefáns Gíslasonar, en e.t.v. komu þar fleiri að, sem ég hirði ekki um að nefna nú.

  Nú þarf bara að smella mynd af húsinu og setja hér við þessa frétt.

Skáksetrið málað í næstu viku.

  Það gæti flokkast undir stórfréttir þegar lúinn múrinn á Skáksetrinu að Heiðarvegi 9 í Vestmannaeyjum fær loksins andlitslyftingu á næstu dögum.  Það hefur lengst svolítið í því að þessar framkvæmdir hafa komist á koppinn, en nú er semsagt búið að útvega málningu og nokkrir vaskir Taflfélagsmenn og velunnarar ætla að skella sér í verkið og láta braka í sér.

  Verður liturinn einhvern veginn svona ?

Ný sveit í burðarliðnum.

  Á undanförnum árum höfum við í Taflfélagi Vestmannaeyja yfirleitt sent 4 sveitir á Íslandsmót skákfélaga.  Eina yfirleitt sterka sveit sem hefur verið í 1 deild fyrir utan síðasta ár (A-sveit), síðan sveit skipuð okkar sterkustu heimaskákmönnum auk valinkunnra hjálparmanna (B-sveit), svo sveit sem hefur verið skipuð minni spámönnum og ýmsum góðvinum okkar (C-sveit) og loks unglingasveit, sem eru skipuð Vestmannaeyskum skákkrökkum að mestu (D-sveit).

  Nú gæti orðið nokkur breyting á þessu, þar sem Ólafur Hermannsson félagi í TV og fyrrum formaður og félagar hans í skákklúbbnum "Frakkalafin" hafa það nú til rækilegrar íhugunar að mynda  saman eina sveit félagsins (hugsanlega E-sveit) á næsta vetri.

  Þessari nýbreytni tökum við að sjálfsögðu afar vel og gerir þetta ekkert nema að lífga upp á hinn fjölmenna TV-hóp á mótinu.

Ólafur gaf félaginu skákbækur sínar.

 Í kvöld færði Ólafur Hermannsson, fyrrum formaður TV (1979-82), Taflfélaginu skákbókasafn sitt að gjöf. Safnið inniheldur 57 skákbækur og 25 árganga af Tímaritinu Skák.  Formaður félagsins, Karl Gauti Hjaltason, tók við gjöfinni, og tók undir óskir Ólafs um að bækurnar yrðu notaðar við kennslu og störf félagsins.

Ólafur safnaði að eigin sögn þessum bókum á sl. 30 árum. Meðal annars pantaði hann flestar þeirra frá útgáfufélaginu Bastford í gegnum Mál og Menningu og sagði hann okkur að stundum hafi þær verið marga mánuði á leiðinni í póstkröfu. Í safninu má m.a. finna bestu skákir Fischers (The Games of Robert J. Fischer) frá 1972,  bestu skákir Tals (Complete Games of Michael Tal 1936-1959), allnokkrar bækur um skákbyrjanir, allar skákbækur sem þýddar voru á íslensku, átta árganga af Informator og fleira og fleira.

Kunnum við í Taflfélagi Vestmannaeyja Ólafi bestu þakkir fyrir gjöfina og heitum því að notfæra okkur bækurnar sem best í komandi framtíð.

 - BÍK

Bókagjöf í kvöld kl. 20.

  Fyrrum formaður Taflfélags Vestmannaeyja, Ólafur Hermannsson, sem var formaður TV á árunum 1979 - 1982 hefur óskað þess að hitta forsvarsmenn félagsins í kvöld og mun hann hafa í hyggju að gefa félaginu skákbækur.

  Í kvöld, þriðjudag kl. 20:00 munum við hitta Ólaf niðri í Skáksetri.

Sævar með brons á Skákþingi Norðlendinga

Í dag var tefld lokaumferðin á Skákþingi Norðlendinga. Sævar gerði jafntefli við Sindra Guðjónsson og tryggði með því bronsverðlaun á mótinu og lauk keppni með 5 vinninga. Gylfi Þórhallsson varð efstur með 6 vinninga sem og Áskell Örn Kárason . Gylfi var úrskurðaður sigurvegari á stigum.

Einar K Einarsson tefldi einnig á mótinu og byrjaði vel vann 2 fyrstu skákirnar en síðan snérust heilladísirnar gegn honum og hann tapaði m.a. með Vodafone gambít í næstsíðustu umferð.

• Heimasíða SA
• Chess-Results

Sævar þriðji á Skákþingi Norðlendinga.

  Félagi okkur úr Taflfélagi Vestmannaeyja, Sævar Bjarnason er í þriðja sæti með 4,5 vinninga eftir næst síðustu umferð á Skákþingi norðlendinga sem fram fer á Akureyri.  Í síðustu umferðinni sem fram fer á morgun teflir Sævar við Sindra Guðjónsson.  Nú eru þeir Gylfi Þórhallsson (2232) og Áskell Örn Kárason (2239) efstir með 5 vinninga.  Lokaumferðin hefst kl. 10.

Grandelius í 2 sæti á mótinu.

  Í síðustu umferðinni gerði Nils Grandelius (2491) sem er félagi í Taflfélagi Vestmannaeyja jafntefli við Tiger (2618) sem tefldi til margra ára með Selfyssingunum (SSON).  Að loknu mótinu er ljóst að okkar maður, sem er lang stigalægstur er í öðru sæti.

Sigeman & Co Chess Tournament 2009

		Elo	1	2	3	4	5	6		Points	Place
1	GM Tomi Nybäck	2655		0	½	½	1	½		2½	3 - 4
2	GM Nigel Short	2674	1		½	1	1	1		4½	1
3	GM Tiger Hillarp Persson	2618	½	½		0	0	½		1½	5
4	GM Ivan Sokolov	2669	½	0	1		1	0		2½	3 - 4
5	GM Emanuel Berg	2610	0	0	1	0		0		1	6
6	IM Nils Grandelius	2491	½	0	½	1	1			3	2

 

Grandelius vann í 4. umferð

Nils Grandelius (2491), nýjasti meðlimur Taflfélags Vestmannaeyja, sigraði Emmanuel Berg (2610) í 4. umferð Sigeman-skákmótsins sem fram fer í Malmö í Svíþjóð. Nils er með 2,5 vinning og er að hækka mikið á stigum. Frábær árangur hjá okkar manni sem er eftir umferðina í 2.-3. sæti ásamt Ivan Sokolov á eftir Short, sem hefur unnið allar sínar skákir til þessa.

Í öðrum skákum gerðu Nybaack og Sokolov jafntefli og þegar þetta er ritað eru Short og Tiger Hillarp Persson enn að tafli.

Sigeman-skákmótið.

 

- BÍK