Taflfélag Vestmannaeyja

6.10.2009 | 15:02

Pistill liðsstjóra C-sveitar TV.

Línurnar lagðar. Mikil spenna byggðist upp á vordögum þegar ljóst var að ný markmið og langtímaáætlun fyrir C-sveit TV var lögð fram af stjórn félagsins. Vægt er til orða tekið að titringur fannst um alla eyju þegar ljóst var að geysimiklar væntingar voru gerðar til sveitarinnar.

Stjórn félagsins lagði fram eftirfarandi
Markmið og áætlun fyrir C-sveit:
a. Árangur yrði bættur um 18% frá fyrra ári.
b. Jafnteflum yrði fækkað um 26,5%.
c. Engin mætti gefa skák fyrstu 25 leikina.
d. Áfengisneysla yrði ekki leyfð tveimur mánuðum fyrir keppnina og ekki í 3 vikur eftir keppni.
e. Neysla áfengis á meðan á keppni stendur skal að vera í hæfilegu hófi.
f. Allir sveitarmeðlimir yrðu að stunda líkamsrækt að hætti Jowels.
  g. Undanþágur :
     g. i. Stebbi Gilla fær undanþágu á síðari málslið d. liðar hér að ofan.
     g. ii. Ólafur Týr fær undanþágu á lið a hér að ofan.
     g. iii. Gauti fær undanþágu frá lið c hér að ofan.
     g. iv. Aðrir sveitarmeðlimir fá engar undanþágur.

Líkamsrækt. Á þessum markmiðum mátti sjá að eitthvað stórt væri í aðsigi. Á pepp-fundum sveitarinnar sem hófust í júní kom fram megn óánægja með ýmsa liði í þessari áætlun, t.d. vildi Stebbi Gilla æfa eftir Atlas kerfinu og sagðist hafa reynt Jowett með afar slæmum árangri og hann væri eiginlega bara hálfur maður eftir.

Kosning liðsstjóra. Þá átti bara eftir að kjósa liðsstjóra sveitarinnar og fóru nú fram leynilegar kosningar. Í fyrstu umferð hlaut Stebbi Gilla 49,7%, Þórarinn hlaut 21,3%, og Gauti 21,1% atkvæða og þurfti því að kjósa að nýju milli Stebba og næstefsta manns. Stuðningsmenn Stebba fóru fram á endurtalningu undir eftirliti ÖSE og eftir að atkvæði höfðu verið endurtalin kom í ljós að einu atkvæði hafði verið laumað í atkvæðabunka annars frambjóðanda og þegar það hafði verið leiðrétt kom í ljós að Stefán hafði hlotið 78,8% atkvæða og varð því réttkjörinn liðsstjóri sveitarinnar.

Æfingar. Leið nú og beið. Æfingar voru háleynilegar og stýrði liðsstjórinn þeim bæði af lævísi og útsjónarsemi. Menn vissu í raun aldrei hvenær næsta æfing yrði eða hvar. Fór svo að lokum að allir urðu sammála um að leika bara e4 í fyrsta leik en ef andstæðingurinn ætti leik þá skyldi trixið vera að leika e5. Þetta gæti komið á óvart og fært sveitinni marga dýrmæta sigra. Þá ákvað liðsstjórinn mjög snemma í undirbúningsferlinu að sveitin ætti sér happatöluna 13.

Mataræði. Eitt að aðalatriðunum í undirbúningnum var að breyta mataræði liðsmanna, en margir þeirra eru þekktir fyrir bágbornar matarvenjur. Eftir að hafa fylgst með auglýsingum um morgunkorn um nokkurt skeið sá liðsstjórinn að Jóhanna Eurovision stjarna borðar svokallaða hafrabagga á morgnanna og gaf hann óðar út fyrirmæli um að allir liðsmenn skyldu verða sér út um pakka af slíkum morgunmat. Mikið kurr varð meðal liðsmanna vegna þessarar ákvörðunar og vildu sumir ekki sleppa hendinni af Coco Puffs-inu, enda ku það vera afar ávanabindandi.

Þrek- og gönguskíðaæfingar. Liðsstjórinn ákvað snemma í september að boða alla sveitarmeðlimi á sérstaka gönguskíðaæfingu þar sem alkunna er að sú íþrótt eflir allra best þol og þrek og var því ákveðið að taka vel á í þeirri íþrótt. Allir meðlimir mættu inn í Herjólfsdal á tilsettum tíma, en því miður hafði ekki snjóað nægjanlega til að æfa skíði svo liðsstjórinn tók þá snilldarákvörðun að grilla bara í staðinn.

Keppnin sjálf. Var nú haldið til keppni í deildó. Til þess að gera langa sögu stutta þá fékk sveitin 13 vinninga og lenti í þrettánda sæti. Flesta vinninga hlaut Daði Steinn eða 3 úr 4 skákum, Ólafur Hermannsson hlaut 2 vinninga af 3 og Alexander sem óvænt fyllti skarð í sveitinni hlaut 2 vinninga úr 2 skákum. Páll Ammendrup (1,5), Kristófer (1,5), Ægir Óskar (0,5) og Gunnar Salvarsson (0,5) náðu hver um sig 50% árangri. Jón R. náði ekki vinningi, en aðrir ótaldir meðlimir sögðu sig frá stjórnunarstöðum í sveitinni.

C - Sveit TV - 4 deild
Lið .................................. GoðA HelC SA B TR E Samt.
Ægir Óskar Hallgrímsson .   (b)    (b)    X     0,5 = 0,5
Páll Ammendrup ..............    0      1     (b)    0,5 = 1,5
Stefán Gíslason ..............    0     0,5   0,5     X    = 1
Jón Ragnarsson .............     X      X    X       0    = 0
Ólafur Hermannsson .......    1      0      1 X    = 2
Karl Gauti Hjaltason ........   0,5    X      0    0,5 = 1
Gunnar Salvarsson .........    0,5 X    X       X    = 0,5
Kristófer Gautason .........     X      0     0,5    (1) = 1,5
Alexander Gautason ......    X      1      1       X   = 2
Daði Steinn Jónsson .......     0      1       1      1    = 3
Samtals ..........................     2     3,5     4     3,5 = 13 = 13 sæti