Pistill liðsstjóra C-sveitarinnar.

  Þá er fyrri hlutanum lokið í deildarkeppninni.  Ég las pistil liðsstjóra A sveitarinnar sem er voða ánægður með sína menn, en það sama verður ekki sagt um undirritaðann.

  Þar sem ég á að heita liðsstjóri C-sveitarinnar þá tek ég á mig alla ábyrgð á slöku gengi sveitarinnar og mun reka aðstoðarmann minn strax, enda unnt að rekja öll mistökin beint til hans.

  C-sveitin er eina sveitin sem engar væntingar voru gerðar til og þar safnast saman skemmtilegustu liðsmenn TV og tefla gjörsamlega stefnulaust.  Markmiðið var að súpa kaffi, spjalla og fylgjast með sigrum í A- og B- sveitum félagsins.  Þá var einnig á stefnuskrá sveitarinnar að grípa í könnu á kvöldin en það kom í ljós að þessir kumpánar voru ekki á þeim buxunum, heldur fóru þeir í koju snemma og stúderuðu jafnvel sumir eldsnemma á morgnana.

  C-sveitin var hugsuð sem nokkurs konar safnþró, eða það var meiningin á bak við þessa sveit.  En alvarlegir hlutir hafa gerst, því það hefur borið á því að nokkrir liðsmenn sveitarinnar hafa sigrað andstæðinga sína eða kannski samið jafntefli.  Grípa þarf til aðgerða gagnvart þessum mönnum og húrra þeim upp í B-sveit eða niður í D-sveit, því þetta var aldrei á stefnuskránni.  Við lögðum upp með að hafa gaman af þessu, en ekki sitja kófsveittir og tefla til sigurs og eyðileggja þar með móralinn í sveitinni.

  Ég legg til að liðsstjórar A- B- og D-sveita sendi metnaðarlausa menn til okkar og við tökum þeim opnum örmum og gætum jafnvel sent þeim menn úr okkar liði sem hafa verið að eyðileggja móralinn.  Þarna hugsa ég sérstaklega til B-liðsins og get ekki stillt mig um að hlakka yfir því hvernig liðsstjóri þess liðs ætlar að reyna að kjafta sig út úr árangri sveitarinnar.

  Til þess að bjarga B-sveitinni legg ég til að Óli Árni og Þórarinn verði fastir liðsmenn þar, enda hafa þeir verið að hala inn mikið af vinningum.  Þá verður Nökkvi að fara úr C-sveitinni enda náði hann 3 vinningum af 4, sem er mjög óhagstæður samjöfnuður við aðra liðsmenn sveitarinnar.  Aðrir sem vert væri að færa úr sveitinni eru t.d. Stefán Gilla sem tefldi miklu betur en við bjuggumst við og Sindri Freyr sem halaði inn 1,5 vinning í tveimur skákum og verður að tefla með D-sveitinni í vor.

  Þeir sem eftir verða í sveitinni stefna að því að halda til Akureyrar í vor og taka á því, fylgjast vel með öðrum Eyjamönnum í baráttu þeirra og styðja þá og hvetja til dáða.  Við munum hafa skoðanir á mistökum þeirra en fagna hverjum sigri.  Kjörorð C-sveitarinnar í vor verður „Það er góður mórall í okkar liði“

Liðsstjóri TV-C.