Taflfélag Vestmannaeyja

9.2.2011 | 23:54

Björn Ívar Vestmannaeyjameistari 2011

8. umferð Skákþingsins fór fram í kvöld.

Sigurður hafði hvítt á Björn Ívar og tefldi nokkuð óvenjulega leið gegn Sikileyjarvörn svarts. Svartur fékk snemma biskupaparið gegn riddarapari svarts en þurfti að reyna að opna stöðuna til þess að virkja biskupana. Hvítur fór þá heldur geist af stað með riddarana sína og stóðu þeir höllum fæti á miðborðinu þar sem þeir völduðu hvorn annan. Svartur hótaði að vinna annan riddarann og þurfti hvítur þá að gefa þá báða fyrir einn hrók. Með biskupaparið í opinni stöðu vann svartur svo örugglega.

Nökkvi hafði hvítt á Sverri sem tefldi Najdorf-afbrigðið. Fljótlega kom upp hið hvassa Gautaborgar-afbrigði þar sem svartur fær góðan reit á e5 fyrir riddara en hvítur opna f-línu og nokkuð virka menn. Svartur hrókaði langt og færði hvítur alla mennina yfir á drottningarvænginn þar sem þeir stóðu ógnandi. Hvítur átti nokkrar vænlegar sóknarleiðir í framhaldinu en kaus að gefa skiptamun með von um að vinna mann til baka í framhaldinu. Svartur átti þá möguleika að halda skiptamuninum vegna máthótunar en sást yfir það og fór út í stöðu manni undir vegna yfirsjónar. Svartur gafst þá strax upp. Með sigrinum gerði Nökkvi út um vonir Sverris að jafna Björn Ívar, sem hefur 2 vinninga forskot fyrir síðustu umferð og hefur þegar tryggt sér titilinn.

Sigurjón hafði hvítt á Kristófer sem tefldi Bogo-indverska vörn. Hvítur byggði stöðuna rólega upp en svartur jafnaði taflið eftir að hafa leikið c5 í miðtaflinu. Mikil uppskipti urðu í framhaldinu og sömdu keppendur um jafntefli í jafnri stöðu.

Einar hafði hvítt á Þórarinn Inga og tefldu þeir spánska leikinn. Hvítur fékk snemma rýmra tafl og átti svartur erfitt með að virkja biskupinn sinn sem stóð á b7. Biskupinn var seinna leppaður vegna stöðu svarts hróks á b8 og hvítur braust þá í gegn á miðborðinu. Hann fékk mjög öflugan riddara á e4 sem hoppaði á d6 og batt svörtu mennina niður. Eftir drottningaruppskipti hafði hvítur mjög hættulegt frípeð auk þess að vinna einnig eitt af peðum svarts. Hvítur innbyrti svo sigurinn af öryggi.

Stefán átti að mæti Eyþóri en þar sem Eyþór mætti ekki til leiks var Stefáni dæmdur sigur.

Daði Steinn hafði hvítt á Hafdísi frænku sína og fékk snemma mun rýmra tafl og virkari menn. Hafdísi sást þá yfir máthótun snemma í miðtaflinu sem hvítur nýtti sér og mátaði svarta kónginn á e8.

Tómas hafði hvítt á Róbert og tefldu þeir rólegt afbrigði spánska leiksins. Mikil uppskipti urðu í byrjuninni en staðan var nokkuð róleg þegar báðir keppendur hófu aðgerðir á kóngsvæng. Tómas varð þá á yfirsjón og tapaði drottningunni klaufalega. Róbert vann örugglega í framhaldinu.

Jörgen hafði hvítt á Gauta sem tefldi Sikileyjarvörn. Gauti vann snemma tvö peð en hvítur hafði smá spil sem hann nýtti sér ekki til fullnustu. Gauti innbyrti sigurinn af öryggi.

Næsta umferð fer fram á sunnudagskvöldið n.k. kl. 19.30. Fyrir hana hefur Björn Ívar, eins og áður sagði, tryggt sér sigurinn. Næstir eru jafnir feðgarnir Sverrir og Nökkvi og verður spennandi að sjá hvort annar þeirra nær að tryggja sér 2. sætið en þeir eru í harðri baráttu við Sigurjón og Einar sem eru hálfum vinningi á eftir þeim.

úrslit 8. umferðar

Bo.	Nafn	Úrslit	Nafn
1	Sigurdur A Magnusson	0 - 1	Bjorn-Ivar Karlsson
2	Nokkvi Sverrisson	1 - 0	Sverrir Unnarsson
3	Sigurjon Thorkelsson	½ - ½	Kristofer Gautason
4	Einar Gudlaugsson	1 - 0	Thorarinn I Olafsson
5	Eythor Dadi Kjartansson	- - +	Stefan Gislason
6	Dadi Steinn Jonsson	1 - 0	Hafdis Magnusdottir
7	Tomas Aron Kjartansson	0 - 1	Robert Aron Eysteinsson
8	Jorgen Freyr Olafsson	0 - 1	Karl Gauti Hjaltason

Staðan eftir 8. umferð

Sæti	Nafn	Stig	Vi	BH.
1	Bjorn-Ivar Karlsson	2211	7½	37
2	Sverrir Unnarsson	1926	5½	39
3	Nokkvi Sverrisson	1787	5½	37½
4	Sigurjon Thorkelsson	2039	5	40
5	Einar Gudlaugsson	1937	5	37½
6	Stefan Gislason	1685	4½	37½
7	Dadi Steinn Jonsson	1590	4½	31½
8	Robert Aron Eysteinsson	1355	4½	26½
9	Thorarinn I Olafsson	1697	4	35½
10	Karl Gauti Hjaltason	1545	4	28½
11	Kristofer Gautason	1679	4	27½
12	Sigurdur A Magnusson	1375	3½	30½
13	Eythor Dadi Kjartansson	1265	2	26
14	Hafdis Magnusdottir	0	2	25½
15	Jorgen Freyr Olafsson	1140	2	25
16	Tomas Aron Kjartansson	1010	½	27

Pörun 8. umferðar

Bo.	Nafn	Vi	Úrslit	Vi	Nafn
1	Kristofer Gautason	4		7½	Bjorn-Ivar Karlsson
2	Sverrir Unnarsson	5½		5	Einar Gudlaugsson
3	Thorarinn I Olafsson	4		5½	Nokkvi Sverrisson
4	Hafdis Magnusdottir	2		5	Sigurjon Thorkelsson
5	Robert Aron Eysteinsson	4½		4	Karl Gauti Hjaltason
6	Jorgen Freyr Olafsson	2		4½	Dadi Steinn Jonsson
7	Stefan Gislason	4½		½	Tomas Aron Kjartansson
8	Eythor Dadi Kjartansson	2		3½	Sigurdur A Magnusson