Taflfélag Vestmannaeyja

3.2.2011 | 00:18

Skákþing 7. umferð - Nökkvi stöðvaði sigurgöngu Björns Ívars

7. umferð Skákþingsins fór fram í kvöld.

Björn Ívar hafði hvítt á Nökkva og tefldi óvenjulega byrjun sem kennd hefur verið við Larsen. Hvítur fékk betra tafl út úr byrjuninni og svartur þurfti að þola örlitlar þrengingar. Nökkvi leysti vandamál sín mjög vel og jafnaði taflið í miðtaflinu. Eftir það skiptist út í endatafl þar sem staðan var hnífjöfn. Björn reyndi að tefla áfram til vinnings en Nökkvi tefldi stöðuna eins og herforingi og hvítur komst ekkert áfram. Jafntefli. Fín taflmennska hjá Nökkva.

Sverrir hafði hvítt á Daða Steinn og tefldi kóngsbragð - ekki í fyrsta skipti! Daði Steinn tefldi byrjunina nokkuð vel og þurfti Sverrir að eyða töluverðum tíma til þess að finna bestu leiðina. Hann gerði það hins vegar, fékk betri stöðu og vann mann og skákina í framhaldinu af öryggi.

Þórarinn Ingi hafði hvítt á Sigurjón sem tefldi sjaldgæft afbrigði í Sikileyjarvörn. Svartur náði að laska peðastöðu hvíts með hagstæðum uppskiptum en Þórarinn leysti vandamálin nokkuð vel og setti pressu á drottningarvænginn. Keppendur sömdu svo um jafntefli í nokkuð jafnri stöðu.

Gauti hafði hvítt á Einar sem tefldi nokkuð lokað afbrigði franskrar varnar. Gauti þurfti að þola töluverðar þrengingar og tók báða keppendur tíma að koma mönnum sínum á framfæri. Gauti braust svo loks í gegn og vann peð eftir leppun. Hann hefði svo getað unnið annað peð, í stöðu sem var talsvert betri á hvítt, en kaus að hörfa sem hleypti Einari aftur inn í skákina. Einar vann svo lið í framhaldinu á skemmtilegan hátt og skákina í kjölfarið.

Róbert hafði hvítt á Stefán sem tefldi skandinavíska leikinn. Stefán vann peð í byrjuninni og í framhaldinu annað en hleypti Róberti óþarflega mikið inn í skákina sem náði að mynda sér frípeð á drottningarvængnum. Róbert tefldi vel í framhaldinu og eyddi Stefán talsverðum tíma í að reyna finna bestu leiðina. Hvítur kaus svo að fórna manni til þess að fækka peðum svarts á borðinu og gafst svo kostur á því að vinna síðasta peð svarts sem hefði leitt til stöðu þar sem svartur hefði tvo riddara gegn einum riddara hvíts. Keppendur sömdu því um jafntefli. Fín úrslit hjá Róberti.

Kristófer hafði hvítt á Jörgen og tefldu þeir ítalska leikinn. Kristófer beitti afbrigði sem hann þekkir vel en Jörgen tefldi prýðilega og nýtti tímann sinn vel. Staðan varð jöfn í miðtaflinu en með seiglu tókst Kristófer að setja pressu á Jörgen sem sást þá yfir að hvítur gæti unnið drottningu hans og gafst upp í kjölfarið.

Sigurður hafði hvítt á Tómas og tefldu þeir nokkuð óvenjulega drottningarpeðsbyrjun. Sigurður vann snemma lið og þrátt fyrir sóknartilraunir svarts varðist hvítur vel og sigldi sigrinum örugglega í höfn.

Hafdís hafði hvítt á Eyþór sem tefldi Petroffs-vörn. Snemma urðu miklar flækjur í skákinni og stóðu menn í dauðanum hægri vinstri. Eyþór kaus þá að fórna báðum hrókunum á mjög skemmtilegan hátt fyrir mátsókn, sem hefði gengið upp ef ekki hefði verið fyrir útsjónarsemi Hafdísar sem tók bara annan hrókinn. Sókn svarts var hins vegar mjög hættuleg og leiddi hún til vinnings skömmu síðar.

Um helgina fer fram Suðurlandsmótið í skák á Selfossi og þar sem nokkrir keppendur Skákþingsins taka þátt fer næsta umferð ekki fram fyrr enn eftir viku, n.k. miðvikudag kl. 19:30.

úrslit 7. umferðar

Bo.	Nafn	Úrslit	Nafn
1	Bjorn-Ivar Karlsson	½ - ½	Nokkvi Sverrisson
2	Sverrir Unnarsson	1 - 0	Dadi Steinn Jonsson
3	Thorarinn I Olafsson	½ - ½	Sigurjon Thorkelsson
4	Karl Gauti Hjaltason	0 - 1	Einar Gudlaugsson
5	Robert Aron Eysteinsson	½ - ½	Stefan Gislason
6	Kristofer Gautason	1 - 0	Jorgen Freyr Olafsson
7	Sigurdur A Magnusson	1 - 0	Tomas Aron Kjartansson
8	Hafdis Magnusdottir	0 - 1	Eythor Dadi Kjartansson

staðan eftir 7. umferð

Sæti	Nafn	Stig	Vi	BH.
1	Bjorn-Ivar Karlsson	2211	6½	29½
2	Sverrir Unnarsson	1926	5½	29
3	Sigurjon Thorkelsson	2039	4½	31
4	Nokkvi Sverrisson	1787	4½	27½
5	Einar Gudlaugsson	1937	4	29
6	Thorarinn I Olafsson	1697	4	27
7	Stefan Gislason	1685	3½	29½
8	Dadi Steinn Jonsson	1590	3½	26½
9	Robert Aron Eysteinsson	1355	3½	23
10	Sigurdur A Magnusson	1375	3½	20½
11	Kristofer Gautason	1679	3½	20½
12	Karl Gauti Hjaltason	1545	3	23
13	Jorgen Freyr Olafsson	1140	2	20
14	Eythor Dadi Kjartansson	1265	2	19
15	Hafdis Magnusdottir	0	2	17½
16	Tomas Aron Kjartansson	1010	½	20½

pörun 8. umferðar (miðvikudaginn 9. febrúar kl. 19:30)

Bo.	Nafn	Vi	Úrslit	Vi	Nafn
1	Sigurdur A Magnusson	3½		6½	Bjorn-Ivar Karlsson
2	Nokkvi Sverrisson	4½		5½	Sverrir Unnarsson
3	Sigurjon Thorkelsson	4½		3½	Kristofer Gautason
4	Einar Gudlaugsson	4		4	Thorarinn I Olafsson
5	Eythor Dadi Kjartansson	2		3½	Stefan Gislason
6	Dadi Steinn Jonsson	3½		2	Hafdis Magnusdottir
7	Tomas Aron Kjartansson	½		3½	Robert Aron Eysteinsson
8	Jorgen Freyr Olafsson	2		3	Karl Gauti Hjaltason