SKÁKEYJAN á leið til áskrifenda.

    Það er mikið gleðiefni að segja frá því að nýjasta tölublaðið af hinu geysivinsæla og víðlesna skáktímariti SKÁKEYJUNNI, fór með landpóstinum í dag til allra áskrifenda þess. Margir hafa hringt grenjandi á ritstjórnina að undanförnu og heimtað sitt eintak og nú er búið að mæta þessari brýnu þörf.

  Umfjöllun í blaðinu var að vonum mest barnamótið sjálft.  Á forsíðu eru myndir úr starfi TV og ávarp Formanns TV.  Á síðu 2 á Björn Ívar Karlsson viðtal við Sigmund Andrésson heiðursfélaga Taflfélags Vestmannaeyja.  Á síðu 3 eru sýnd fjögur skákdæmi úr nýjum skákum yngri kynslóðar félagsins.  Þetta eru skákir frá HM 2009 í Tyrklandi, NM 2010 í Svíþjóð, NM barnaskólasveita 2009 í Eyjum og úr Skákþingi Vestmannaeyja 2010.  Skákmennirnir eru Kristófer Gautason, Róbert Aron Eysteinsson, Sigurður Arnar Magnússon og Daði Steinn Jónsson.  Á baksíðunni eru síðan litmyndir af keppendum á Íslandsmóti barna í Eyjum 28. mars 2010.

  En sem sagt áskrifendur fá blaðið sitt inn um lúguna eftir helgina og ætti þá símhringingum að linna hér á ritstjórnarskrifstofunum.