Björn Ívar með örugga forystu á Skákþinginu

Björn Ívar Karlsson er með 1,5 vinnings forskot á næstu menn að lokinni 6. umferð Skákþings Vestmannaeyja, sem var tefld í kvöld.    

     Björn Ívar hafði svart gegn Nökkva og beytti Björn mjög hægfara og lokuðu afbrigði  tískuvarnar, eins og hans var von og vísa, og má segja að hann hafi þvingað sinn stíl upp á Nökkva. Björn vann snemma peð og jók hægt á yfirburði sína en þurfti að hafa fyrir sigrinum. Eftir miklar tilfæringar í lokaðri stöðu kom að lokum gegnumbrot hjá svörtum og veik peðastaða hvíts lét undan. Björn innbyrti svo sigurinn eftir rúma 40 leiki.

     Sigurjón hafði hvítt á Daða Stein sem tefldi Steinitz-afbrigði Spánska leiksins. Sigurjón fékk rýmri og þægilegri stöðu sem sprakk út á réttum tíma og vann hann peð með smáfléttu. Hann jók svo frumkvæði sitt smátt og smátt og sigraði.

     Kristófer hafði hvítt á Sverri sem beytti Tískuvörn en taflið þróaðist snemma út í nokkurs konar drekaafbrigði Sikileyjarvarnar. Kristófer sótti snemma á kóngsvæng og virtist á tímabili hafa nokkuð vænleg færi en reynsluna vantaði og smá yfirsjón í endatafli gerði út um skákina.

     Einar hafði hvítt á Stefán, sem tefldi Caro-kann. Skákin fór snemma út af þekktum slóðum en Stefán er einmitt þekktur fyrir að fara sínar eigin leiðir við skákborðið. Einar vann peð en við það fengu menn Stefáns smá pláss til að athafna sig. Hann var þó undir töluverðri pressu lengst af og varð að lokum að fórna manni til þess að forðast mát. Þar gengu heilladísirnar með honum í lið og Einari fataðist flugið og tapaði að lokum í lengstu, og jafnframt skemmtilegustu skák umferðarinnar.

     Ólafur Týr hafði hvítt á Þórarin sem tefldi Benkö-bragð gegn drottningarpeðsbyrjun hvíts. Ólafur missti af skemmtilegri fléttu í miðtaflinu sem leiddi til mikils og alvarlegs mannsfalls. Í raun átti hvítur aldrei möguleika eftir það og skákinni lauk með sigri Þórarins í 22 leikjum.

     Lárus hafði hvítt á Gauta sem tefldi Sikileyjarvörn, en hann hefur nýlega tekið ástfóstri við hana. Gauti fékk rýmri stöðu og beindi biskupum sínum og drottningu að kóngi Lárusar. Lárus missti svo af smáfléttu sem leiddi til falls drottningarinnar og féll svo konungsríkið einnig skömmu síðar.

     Róbert hafði hvítt á Sigurð og tefldi Róbert skoska-bragðið sem leiðir oft á tíðum til snarpra átaka. Sigurður hirti peðið sem Róbert fórnaði og kom betur út úr byrjuninni. Róbert hafði opnar línur fyrir mennina sína og vann liðsaflann til baka með betri stöðu. Honum varð svo á smá ónákvæmni sem leiddi til þess að Sigurður átti gangandi þráskák og lauk skákinni með jafntefli.

    Jörgen hafði hvítt á Eyþór sem tefldi byrjunina nokkuð vel og upp kom jöfn staða í miðtaflinu. Þá kom reynsluleysi Eyþórs til sögunnar og hann lék af sér manni og stuttu seinna hrók. Þá var ekki að sökum að spyrja og reyndist úrvinnslan Jörgen auðveld.

Sjöunda umferð verður tefld nk. miðvikudagskvöld, 3. febrúar kl. 19:30.

Úrslit 6. umferðar:

Bo.	Name	Pts	Res.	Pts	Name
1	Nökkvi Sverrisson	3½	0  -  1	4½	Björn Ívar Karlsson
2	Sigurjón Þorkelsson	3	1  -  0	3	Daði Steinn Jónsson
3	Kristófer Gautason	3	0  -  1	3	Sverrir Unnarsson
4	Einar Guðlaugsson	3	0  -  1	2½	Stefán Gíslason
5	Ólafur Týr Guðjónsson	2½	0  -  1	2½	Þórarinn I Ólafsson
6	Lárus Garðar Long	2	0  -  1	1½	Karl Gauti Hjaltason
7	Róbert Aron Eysteinsson	1	½  -  ½	1	Sigurður A Magnússon
8	Jörgen Freyr Ólafsson	1	1  -  0	0	Eyþór Daði Kjartansson

staðan eftir 6 umferðir

Rank	Name	Rtg	Pts	BH.
1	Björn Ívar Karlsson	2175	5½	24
2	Sigurjón Þorkelsson	1885	4	25
3	Sverrir Unnarsson	1880	4	24½
4	Nökkvi Sverrisson	1750	3½	24
5	Stefán Gíslason	1650	3½	23
6	Þórarinn I Ólafsson	1640	3½	22
7	Einar Guðlaugsson	1820	3	25½
8	Kristófer Gautason	1540	3	23
9	Daði Steinn Jónsson	1550	3	21½
10	Ólafur Týr Guðjónsson	1650	2½	20½
11	Karl Gauti Hjaltason	1560	2½	20
12	Jörgen Freyr Ólafsson	1110	2	19½
13	Lárus Garðar Long	1125	2	18
14	Róbert Aron Eysteinsson	1315	1½	17½
15	Sigurður A Magnússon	1290	1½	16
16	Eyþór Daði Kjartansson	1275	0	18½
17	Davíð Már Jóhannesson	1185	0	18

Pörun 7. umferðar:

Bo.	Name	Pts	Res.	Pts	Name
1	Björn Ívar Karlsson	5½		3	Kristófer Gautason
2	Sverrir Unnarsson	4		4	Sigurjón Þorkelsson
3	Stefán Gíslason	3½		3½	Nökkvi Sverrisson
4	Þórarinn I Ólafsson	3½		3	Einar Guðlaugsson
5	Daði Steinn Jónsson	3		2½	Ólafur Týr Guðjónsson
6	Karl Gauti Hjaltason	2½		2	Jörgen Freyr Ólafsson
7	Sigurður A Magnússon	1½		2	Lárus Garðar Long
8	Eyþór Daði Kjartansson	0		1½	Róbert Aron Eysteinsson

mótið á chess-result