Pistill liðstjóra A liðs TV.

     Fyrir seinni hlutann höfðum 1,5 vinnings forskot á Bolvíkinga og 3 vinninga forskot á Helli. Við áttum eftir að mæta Bolvíkingum og Hellismönnun þannig að allt þurfti að ganga upp ef sigur ætti að hafast í mótinu. Við héldum liðsfund í hádeginu á föstudeginum þar sem ég fór yfir stöðuna með liðinu og hvað við þyrftum að gera til að vinna mótið.  Ég lagði upp með að við þyrftum að vinna Helli 5-3 í umferðinni um kvöldið til að geta unnið mótið en við áttum auk Hellis eftir að mæta Haukum og  Bolvíkingum. Bolvíkingar áttu eftir að tefla við veikari andstæðinga en við þannig að sigur gegn Helli var nauðsynlegur.     Við vorum með þrjá nýja liðsmenn í þetta skiptið en þeir voru Finninn Tomi Nybäck (2656), Þjóðverjinn Jan Gustafsson (2647) og Pólverjinn Kamil Miton (2600). Norðmaðurinn Jon Ludvig Hammer var líka innanborðs en hann tefldi einnig fyrir okkur í fyrri hlutanum. Mikhail Gurevich sem tefldi með okkur í haust komst ekki í þetta skiptið.     Við vorum bjartsýnir þegar við settumst á móti Hellismönnum í 5. umferðinni á föstudagskvöldinu. Nybäck tefldi við hinn ofursterka Mirochnicenko (2670) og fékk betra tafl án þess þó að geta nýtt sér það til sigurs. Á öðru borði tefldi Jan Gustafsson sveiflukennda skák við Adly og var ýmist með tapað eða unnið en á endanum var það Adly sem mátti þakka fyrir jafnteflið. Á þriðja borði tefldi Hammer við Indverjann Gubta og þar var staðan tvísýn þegar Hammer hafnaði þrátefli og teygði sig of langt í vinningstilraunum sínum sem enduðu með því að hann tapaði. Á fjórða borði fékk Kamil Miton erfitt tafl upp úr byrjuninni og hartnær tapað tafl gegn Hannesi Hlífari. Miton snéri taflinu sér í vil þegar leið á skákina og var nálægt því að vinna þegar Hannes rambaði á þráskák. Helgi tefldi á 5. borði og sigraði Björn Þorfinnsson glæsilega í bestu skák mótsins að mínu mati. Ingvar Þór tefldi á 6. borði og sigraði hinn efnilega Hjörvar Stein í hörkuskák. Kristján Guðmundsson og Páll Agnar Þórarinsson tefldu á síðustu borðunum og hvorugur þeirra sá til sólar þennan dag. Tap 3,5-4,5 var gegn gangi skákanna að mínu mati og sigur í þessari viðureign hefði verið eðlileg niðurstaða. Bolvíkingar unnu upp forskot okkar og gott betur með stórsigri á Haukum 7,5-0,5. Þar bar helst til tíðinda að Sverrir Þorgeirsson hélt jöfnu gegn Luke McSane (2683) en hann var stigahæsti maður mótsins.       Við tefldum einmitt í 6. umferð við Haukana og unnum öruggan sigur 7,5-0,5. Kristján og Páll Agnar hvíldu í þessari umferð og undirritaður og Björn Ívar komu nú inn í liðið. Undirritaður gaf tóninn með skjótum sigri á Sigurði Guðjónssyni í 19. leikja skák. Síðan komu vinningarnir einn af öðrum en eftir sat Nybäck á móti Sverri Þorgeirssyni í jöfnu endatafli. Nyback reyndi hvað hann gat til að kreista vinning í stöðunni en Sverrir varðist vel og hélt jöfnum hlut, rétt eins og móti Luke McShane í umferðinni á undan.     Fyrir síðustu umferð var ljóst að við þurftum að sigra Bolvíkinga 5,5-2,5 til að verða Íslandsmeistarar í fyrsta skiptið. Það tókst næstum því, en hér voru örlaganornirnar okkur óvilhallar rétt eins og á móti Hellismönum. Við unnum 4,5-3,5 en stöðurnar gáfu tilefni til stærri sigurs. Á fyrsta borði sigraði Nybäck stigahæsta mann mótsins Luke McShane örugglega. Jan Gustafsson var hársbreidd frá sigri á öðru borði en varð að sætta sig við þráskák í unninni stöðu. Á þriðja borði reyndi Hammer lengi að vinna sína skák en allt kom fyrir ekki og jafntefli var óumflýjanlegt. Miton sigraði Pelletier á 4. borði í vel útfærðri skák. Helgi og Jóhann Hjartarson gerðu stutt jafntefli á 5. borði. Á 6. borði var Ingvar Þór allan tímann með betra tafl gegn Jóni L. og mátti stórmeistarinn þakka fyrir jafntefli. Á 7. borði var Kristján mistækur á móti Stefáni Kristjánssyni og tapaði. Páll Agnar tefldi á síðasta borði og var rétt eins og Jan Gustafsson hársbreidd frá sigri en rataði inn í þráskák gegn Braga Þorfinnssyni. Sem sagt sigur á Íslandsmeisturunum 4,5-3,5 og einum vinningi frá því að verða Íslandsmeistarar. Enn eitt árið urðum við í 2. sæti en aldrei höfum við þó verið jafn nálægt því að vinna mótið. Það hlýtur að vera komin röðin að okkur næst!

     Maður liðsins finnst mér vera Ingvar Þór sem tefldi allar skákirnar 7 og fékk 6 vinninga. Einnig er rétt að minnast á Björn Ívar sem tefldi þrjár skákir fyrir a-liðið og vann þær allar.