Vorum hársbreidd frá sigri.

   Eins og kunnugt er endaði a-sveit TV í öðru sæti á Íslandsmóti skákfélaga um helgina í skugga kæru Bolvíkinginga vegna Alexey Dreev sem tefldi á fyrsta borði okkar.

5. umferð

Okkur tókst hið ótrúlega að vinna Bolvíkinga, jafnvel þrátt fyrir að þeir væru stigahærri á 7 borðum af 8! Sú viðureign var þrungin spennu frá upphafi til enda og allan tímann voru margir áhorfendur yfir borðunum þar sem við tefldum. Við höfðum hist í hádeginu sama dag til að fara yfir viðureignina og þar var ákveðið að við þyrftum a.m.k. 3 vinninga á borði 1-5 og 1 vinning á borði 6-8 til að eiga möguleika gegn Bolvíkingum. Jafntefli var bannorð á fyrstu 5 borðunum en ákveðið var að í lagi væri að sættast jafntefli á neðstu þremur borðunum ef þau byðust þar sem okkar menn voru mun stigalægri þar.

 

Það liðu ekki nema 30 mínútur þar til stórmeistarinn Þröstur Þórhallsson bauð mér jafntefli á 6. borði og tók ég því. Ég sá reyndar eftir því þar sem ég var með betra tafl og gat teflt áfram án þess að taka áhættu. En minnugur þess hvað við lögðum með upp fyrir viðureignina sættist ég á jafntefli. Skák Dreevs og Baklan á fyrsta borði var lengi í járnum en Baklan bauð jafntefli sem Dreev þáði enda með skiptamun undir en þó með gott spil fyrir. Ég hafði það á tilfinningunni að Bolvíkingar væru hræddir við okkur eins og jafnteflisboð Þrastar gegn mér og Baklans gegn Dreev sýndu. Skák Natafs og Kuzubovs á öðru borði var í jafnvægi allan tímann og jafntefli var samið þegar komið var út í endatafl. Skák Helga og Miezis var dramatísk og Helgi var með betra allan tímann. Þráleikið var í stöðu sem Helgi var með unnið í en það var ekki auðfundinn vinningur. Helgi var ósáttur við jafnteflið eins og sönnum keppnismanni sæmir. Skák Maze og Jóhanns Hjartarsonar skipti nokkrum sinnum um eigendur en okkar maður vann á endanum í snúnu riddaraendatafli. Hinn ungi Svíi í liði okkar, Nils Grandelius, rúllaði Jóni L. Árnasyni upp í skemmtilegri skák en þetta var frumraun hans fyrir TV og vissulega lofar þessi 17 ára gamli Svíi góðu fyrir framtíðina. Páll Agnar fékk fljótt góða stöðu gegn Jóni Viktori og á einum stað gat hann einfaldað stöðuna til vinnings. Það tókst ekki og staðan leystist upp í jafntefli. Björn Ívar sá aldrei til sólar gegn Braga Þorfinnssyni og tapaði.

Borð	Titill	TV a	Stig	Titill	Bolungarvík a	Stig	4,5:3,5
1	GM	Dreev Alexey	2653	GM	Baklan Vladimir	2644	½ - ½
2	GM	Nataf Igor-Alexandre	2529	GM	Kuzubov Yuriy	2634	½ - ½
3	GM	Olafsson Helgi	2522	GM	Miezis Normunds	2558	½ - ½
4	GM	Maze Sebastien	2515	GM	Hjartarson Johann	2596	1 - 0
5	IM	Grandelius Nils	2496	GM	Arnason Jon L	2491	1 - 0
6		Thorarinsson Pall A	2253	IM	Gunnarsson Jon Viktor	2462	½ - ½
7	FM	Thorsteinsson Thorsteinn	2286	GM	Thorhallsson Throstur	2433	½ - ½
8		Karlsson Bjorn-Ivar	2200	IM	Thorfinnsson Bragi	2360	0 - 1

 

Frábær sigur 4,5-3,5 sem síðan var dæmdur af okkur þar sem kæra Bolvíkinga út af Dreev var tekin til greina. Þessi úrskurður fór illa í okkar liðsmenn sem höfðu barist til síðasta blóðdropa til að sigra Bolvíkinga. Ákveðið var að áfrýja úrskurðinum í þeirri von að honum yrði snúið okkur í vil enda töldum við okkur hafa öll gögn í málinu sem sönnuðu að Dreev gekk í TV sl. sumar.

6. umferð

Fyrir næstu umferð vorum við því annað hvort með 1,5 vinnings forskot á Bolvíkinga eða 0,5 vinnings forskot, allt eftir því hvort áfrýjun okkar í máli Dreevs yrði tekin til greina. Í þessari umferð mættum við sveit Hellis-b og unnum á endanum 6,5-1,5 sem voru viss vonbrigði. Dreev vann Omar Salami örugglega. Sama gilti um Nataf, Helga, Maze, Grandelius og Pál gegn sínum andstæðingum. Sjálfur varð ég að sætta mig við jafntefli gegn Sæbergi Sigurðssyni en ég varð að velja á milli jafnteflisleiðar eða að taka á mig mun verri stöðu. Sömu lögmál voru uppi á teningnum hjá Birni Ívari gegn Ögmundi Kristinssyni en Björn hafnaði þar jafnteflisboði, tók á sig verri stöðu og tapaði á endanum. Enn og aftur var vinningur Dreevs tekinn af okkur og því endaði viðureignin 5,5-1,5. Bolvíkingar unnu Hellismenn-a 7,5-0,5 í þessari umferð og skutust þar með upp fyrir okkur í fyrsta sætið.

 

Borð	Titill	Hellir b	Stig	Titill	TV a	Stig	1½:6½
1		Salama Omar	2272	GM	Dreev Alexey	2653	0 - 1
2		Halldorsson Bragi	2240	GM	Nataf Igor-Alexandre	2529	0 - 1
3		Kristinsson Baldur	2166	GM	Olafsson Helgi	2522	0 - 1
4		Loftsson Arnaldur	0	GM	Maze Sebastien	2515	0 - 1
5		Berg Runar	2129	IM	Grandelius Nils	2496	0 - 1
6		Bjornsson Gunnar	2123		Thorarinsson Pall A	2253	0 - 1
7		Sigurdsson Saeberg	2118	FM	Thorsteinsson Thorsteinn	2286	½ - ½
8		Kristinsson Ogmundur	0		Karlsson Bjorn-Ivar	2200	1 - 0

 7. umferð

Við urðum því að vinna stórt í síðustu umferðinni til að eiga möguleika á því að verða Íslandsmeistarar. Við tefldum við a-sveit Fjölnis og unnum með 6,5-1,5. Dreev og Nataf komust ekkert áleiðis gegn andstæðingum sínum. Helgi vann fjöruga skák gegn Faruk Tairi. Maze vann langt endatafl gegn Davíð Kjartanssyni með Hrók+Biskup á móti Hrók og var unun að horfa á þá úrvinnslu. Grandelius sigraði Færeyinginn Rogva Rasmussen örugglega. Páll Agnar komst ekkert áfram gegn jafnteflisvélinni Jóni Árna Halldórssyni. Mér tókst að hafa sigur á Bjarna Hjartarsyni í örlítið betra endatafli. Björn Ívar vann svo Sigríði Helgadóttur örugglega.

 

Borð	Titill	TV a	Stig	Titill	Fjölnir a	Stig	6½:1½
1	GM	Dreev Alexey	2653	GM	Steingrimsson Hedinn	2540	½ - ½
2	GM	Nataf Igor-Alexandre	2529	IM	Henrichs Thomas	2461	½ - ½
3	GM	Olafsson Helgi	2522		Tairi Faruk	2298	1 - 0
4	GM	Maze Sebastien	2515	FM	Kjartansson David	2303	1 - 0
5	IM	Grandelius Nils	2496		Rasmussen Rogvi W	2154	1 - 0
6		Thorarinsson Pall A	2253		Halldorsson Jon Arni	2202	½ - ½
7	FM	Thorsteinsson Thorsteinn	2286		Hjartarson Bjarni	2112	1 - 0
8		Karlsson Bjorn-Ivar	2200		Helgadottir Sigridur Bjorg	1711	1 - 0

 

Bolvíkingar unnu b-sveit Hellis 8-0 og enduðu þar með í efsta sæti. Ég hef reifað málsmeðferð mótstjórnarinnar og dómstóls Skáksambandsins á öðrum stað en þar vorum við órétti beittir. Þetta hafði niðurdrepandi áhrif á liðsmenn okkar og ég er þess fullviss að vinningarnir hefðu orðið fleiri ef þetta mál hefði ekki komið upp. Ljóst er að við höfum byggt upp lið sem getur sigrað deildakeppnina og það verður gert strax á næsta ári.

 Árangur einstakra liðsmanna TV-a

Titill	Nafn	Skákstig	Land	Vinningar	Skákir
GM	Dreev Alexey	2653	RUS	2	3
GM	Nataf Igor-Alexandre	2529	FRA	5	7
GM	Olafsson Helgi	2522	ISL	5,5	7
GM	Hoffmann Michael	2513	GER	2,5	4
GM	Maze Sebastien	2515	FRA	6,5	7
IM	Grandelius Nils	2496	SWE	3	3
	Thorarinsson Pall A	2253	ISL	4	7
FM	Thorsteinsson Thorsteinn	2286	ISL	5	7
	Karlsson Bjorn-Ivar	2200	ISL	3	7
	Bjornsson Bjorn Freyr	2166	ISL	1	2
IM	Bjarnason Saevar	2171	ISL	0,5	2

 ·         Dreev var þéttur og stóð fyrir sínu. Skákmaður af hæsta gæðaflokki
 ·         Það sama gildir um Nataf
 ·         Helgi stóð sig mjög vel og sýndi gamla og góða takta
 ·         Hoffmann sýndi minna en búast mátti við og var því settur út úr liðinu
 ·         Maze tefldi vel, af mikilli grimmd og uppskar vel
 ·         Grandelius er með 100%. Maður framtíðarinnar
 ·         Páll barðist vel. Góður liðsmaður sem stóð fyrir sínu
 ·         Ég tefldi ekki vel og uppskar meira en stöðurnar gáfu tilefni til
 ·         Björn Ívar brást alveg í seinni hlutanum en tefldi vel í þeim fyrri. Verður að tefla meira
 ·         Björn Freyr gerði nokkurn veginn það sem búast mátti við af honum
 ·         Sævar tefldi illa og uppskar samkvæmt því
Þorsteinn Þorsteinsson, liðsstjóri a-sveitarinnar